Kawng chhawng leh nuai thum sem

Kan Chief Mi­nister zahawm tak Pu Zoramthanga hian inthlan hma khan MNF flagship programme ni awm takin kawng chhawng leh cheng nuai thum sem tur thu kha a sawi nasa viau a. 

Tunah CM a lo ni ta a, mahse inthlan dawna a thusawi tam ber leh ngaih pawimawh ber ni ṭhin kawng chhawng leh cheng nuai thum sem erawh MNF party flagship programme a nih loh thu leh budget-ah pawh a awm loh thu a sawi leh ta daih mai! 

Mizote hi bum nuam tak hnam kan lo ni reng mai tih hi tuna hnam changkang tak anga kan lan hnu pawh hian a lang dik reng tho mai tih kan politician lu ber berte thu sawi duh vel dan aṭang pawh hian a chiangin ka hria. 

MLA election dawn khan cheng nuai thum sem a nih tur thu hi vawi tam a sawi a, thingtlang kilkhawr ber thleng pawhin an hria ang. Kawng chhawng siam a nih tur thu te, ropeway leh thil tam tak a sawi a, amah kan CM ber pawh hian a thusawi zawng zawng hi video clip tawi te te hmuh theih turin a la awm tih a hre chek ang a; amah kan CM ngei pawh hian social media lamah a hmu ve fo ngei ang.  

Tun hnaia zawh tak, sesssion-ah khan House member zahawm tak Dr. Vanlalthlana, MLA chuan tihian a zawt a, 'Aizawl khawpui tih ziaawm tumna atana kawng chhawng siam tur hi eng chen nge kalpui a nih tawh?' ti zawngin. 

CM hian, 'Aizawl khawpui tih ziaawm tumna atana kawng chhawng siam tur hi PWD aṭang chuan hmalakna engmah a awm lo. PWD-in Feasibility Study Report dawn a nei lo' tiin a chhang a. Mipui hian inthlan hmaa Pu Zorama thusawi leh tuna a chhanna hi thil inmil a ni thei em tih te hi kan ngaihtuah a ngai a, kan hruaitute leh sorkar ngei pawh hi a kal dan a dik loh chuan a khalh ngiltu turte chu mipui kan ni. 

Kan CM hian vision tam tak a lo nei tawh ṭhin a, tih hlawhtlin atana itawm tak tak 'dream' pawh a sawi nual tawh a ni. Hman deuh khan Mizoram hi Switzerland of the east a siam min tiam tawh a, chakai farm, missionary nuaih khat, blue diamond leh thil dang tam tak min sawi hmuh tawh a, a thu sawi te kha a taka a chantir pakhat tal a awm tawh em? 

Kan ram hruaitute hmalaknaah mipuiten kan thlawp tlat tur a ni a, chutihrualin ram hruaitute pawh ni se, mipuite kawng dik lo min zawh puitute erawh chu mipuite hian kan khalh ngial ve thung tur a ni. Mitdel leh mitdel in hruai chu khuarkhuruma tlak an hmabak si a.