Sawitu 99 aiin thawktu pakhat
Thu ṭha pui pui sawi te, thu ropui tak tak chhak chhuah mai te hi, thil har teh chiam a ni lo. A taka thawh lai tak hi a har ber zawk chu a ni.
Kan politician tam zawk hi chuan boruakah in min sak saka, lui awm lohnaah Lèi dawh kai min tiam a; politics-ah theih loh a awm lohzia min rin tir zet hnuah lalna an han chang ta cheng a, 'a theih loh', 'kawng a awm lo' tihah bawk min sirtluk pui leh a. Heti hrim hrim chuan politics hi dawt insawisiakna ang lekah mipui hian kan ngai maiin ka ring.
Kan politician-te zingah hian thusawi chauh duh tawk, a taka thawh tum lo, a ngaihna hre lo leh ngaihtuahna pawh seng peih miah lo hi an awm nukin ka ring. Hetiang mite hian mipui sum eiruk (eilan pawh ti ila, a dik tho) te hi an hrat zekin ka ring a ni.
Kan politician-te zingah mahni bial leh district hmasawnna tur aia inthlan leh hun tur thlir lawk reng renga hmanhlel kan neih ṭhin avangin ramin hma a sawn tak tak thei ṭhin lo a ni. Mahni bial leh district tana ṭha tur hi chu thawk miah miah mai se, tlak pawh huamin bei ngam se, eng vangin nge kan ram zim tèah hian hmasawnna chu a lo thlen loh tehlul ang.
Kan ram hian kawng engkimah sawitu ringawt ni lo, a taka thawktu a mamawh takzet a ni. Sawitu sawmkua leh pakua aiin thawktu pakhat hi tlem zawk angin lang mah se, chhungkua, kohhran, khawtlang, ram leh hnam tan hian pawimawhna an nei tam zawk a ni.
Orator ṭha tak tak kan nei a. MLA heti zat, Minister heti zat kan neih tawh hnuah pawh kan ram chu heti mai hi a la ni tlat si. Thil tak tak ngaihtuah thleng lo, a sawi hnuhnung thu apiang dik emaw ti tlat mipui zingah kan tam lutuk te hian he ram hi a ei chhe zo tawh a nih hi. Mi nawlpui hian politics chhungril hi hriat chian tumin, zir peih ila, a tak ram kan thlen theihna turin ngaihtuahna tal hi lo seng ve peih ni ila chuan heti mai hi chu kan ni lo ang.
Mipuite hian sawitu ringawt ni lo, a taka hnathawk, kan veng, bial leh district tana ṭhahnemngai takte hi MLA atan pawh vawrh tling thei zel ila, hma chu kan sawn ngei ang. Political party hminga kan buai chhung chuan, kan
ṭhenawm state-te hnungah kan kal zel ang. Congress, MNF, ZNP leh MPC tih velah hian buai lo phawt teh ang u.
A tawp berah chuan, he ram hian sawitu sawmkua leh pakua aiin, thawktu pakhat a mamawh zawk tih hi i hre reng ang u.
- Biaksiamtluanga