Sum siamna 'Tourism'

India hmar chhakah tourism-in hma a sawn nasatzia te, Nagaland te tourism lama an ṭhan nasatzia te kan hmu a, kan awt em em a, Mizoramah erawh chuan tourism hi Mizoram pumin hma kan sawn a, hna a siam belhna atan tih lam ai chuan a ti thei tam vak loten sum siam nan kan hmang ṭangkai hle. Tourism-a Mizoram kan hlawhchhamzia hi sawi em em a ngai lo, mipui nawlpui hian kan hria a ni.

Golf Course siam a ni tih tur thu kan han hria a, tourism lam hawi bawk a ni. A ṭha dawn hian kan hre khawp mai a! India ram, hmun leh ram nei ṭha tak tak
aṭangin Mizoramah golf khel turin an rawn kal ṭhin a, chung rawn kalte chu mi hausa tak tak an nih avangin Mizoramah sum an rawn hmang huau huau ang a, kan va hlawkpui nasa dawn tak em!

Mipui nawlpuiin kan lawm leh kan khelh peih, football khelhna tura mual ṭha siamna tur hmun rem kan nei tlem sia, golf course hi siam ila, hma kan sawn phah viau mai thei a ni.

Tourism hmasawn-na turin kût eng eng emaw kan siam kan ti a, mahse heng kan kut neih hman dante hi han en ila, tourism tihhmasawnna tur nge, tute emaw sum siamna zawk ni ang aw? Chapchar Kût hmanna turin sum ṭhahnem tak mai sorkar chuan a ruahman leh ta a, he sum hi, hlawkna ûm hauh lo leh, tourism tihhmasawnna tak tak atana Chapchar Kût cheibawl nana hman ni ta vek se, kan kût hi a ropui thei viau ang.

Chapchar Kût pawhin hma a sawn theih lohna chhan te, a pui hleih theih lohna chhan te hi pawisa hman chuan ṭeuh kan tum vang a ni ngei ang. Tuna kan hman ṭhin dan angte chu cheng nuai 15 pawh kan seng tling teuh lo ang.

Kût dang kan buat-saihte lah Chapchar Kût kan hman dan hrul vekah kan hmang a, kût ai mahin sorkar function pawimawh a ang zawk. Kût a nih chuan mipui nawlpui pawhina an phurpui tur a nih laiin, huau lawm satliah deuh ṭhenkhat, item nei tur leh, pawl anga inhlawh tur ṭhenkhatten an ngaihven a ni deuh chauh hlawm.

Kan hnamzia leh nunphung hmanga khualzinte hip luh hi kan thiam lo nia a lan mai bakah, khualzin hip thei tur ngaihtuahtu lam hian an ngaihtuah tak tak lo a nih hmel. Sawi tak angin tourism hi sum siamna angah kan ngai deuh niin alang; hetiang a nih chhung hi chuan tourism-ah hian hma kan sawn thei lo ang. Kan hnamzia leh culture te hi kan phochhuak thiam lo ropui mai si a, kan nihna chhuang taka hnam dang zinga phochhuah ai chuan kan inzahpui a, kan nihna angin kan lang ngam bawk si lo.

Hnam dang leh kei-mahni, Mizote ngei pawhina kan ngaihhlut ṭhinte lah, a nihna leh a hlutna bo ṭhak ṭhak ten kan cheibawl leh mai ṭhin si. Tourism chungchanga kan kan hmalak dan leh kan kal dan hi chu enṭhat deuh a ngai a, mi tihdan zirchunga kan kal dan kan siam ṭhat deuh loh chuan hma kan sawn tak tak thei lo. Tourism hi mimala hlawkpui phet tumna rilru te hi kan paih loh chuan hma kan sawn thei lo ang.

- Lalthununa Fambawl