SAWMFANG

"Nghilhni awm lo ka lung min lên, a saw zalam phei duai a sawmfâng hmun sawn," tiin kan thinlungah a ri dawt dawt ṭhin a nih hi. A chhan chu maw! kum tin mai a buh hmun nei ṭhin leh Mîmkût Thla a lo nih a, buh àt tura ram lama kan in pu lut ṭhin te kha mitthlaah hian a chàm reng si a nih hi, hei hi alawm Mizo ka nihna min ti chiangtu chu ni. 

Ni e, Thlam piah kawrte a tuikhur te kha, siamtu hian chhawl halte min dawm tura a lo siam lawk sa chu. A bul pangper mual sir aṭanga lut chhovin ngaihruatna thinlung puin, rinna mitin kan han thlîr kual vel a, buh hmin mawi em em mai chu kil tin aṭangin thlifim chuan a chhem kur dial dial a, a rim te lah chu a tui em em mai a. Ka ṭhiante chu ko khawmin, Bân pahnih phar chhuaka dingdihlipa maimitchhingin, boruak kan han hîp vang vang a, theih tawpa thâwk han lâk hnu-ah tlemte tein kan han thaw chhuak leh a, kan insang mar ta maw tihah chuan Iptepui chu zenin Favah (buh lakna) chu kan phawrh a, Lo mawng lamah chuan chhuk thla in, Lo mawng lam mual mar chinah chuan kan inzarpharh a, a lu lam pan chho zawngin kan han àt ṭan a. Thlawhlai Thingkha ro ding zarah te chuan Ṭhuro nupa chuan Chuchurikûkkûk tia hramin mual tin an awi a, tlaiberh rualte chuan Berekberek tih pah hian buh kara Pît rual awm hote chu an rawn um darh kual vel leh bawk a, hmuh an nuam ṭhinin nun an ti hlim ṭhin mang e. 

Buh kan han àt zo va, a kungah chuan kan han bang bu suau a, a vui ṭha deuh te phei chuan Lei an si deuh thaw ṭhin bawk a. Ni sensa takin ni hnih thum vel an han èm a, a ro ṭha ta maw tihah Buh vaw tur chuan kan  han liam thla leh ta sang sang ṭhin kha a nia, kumin zet zawng Buhtuh ta lo chu, a rim pawh hriat tur a awm ta lo. 

Tualchhung mite Buh hmun han thlir ringawt pawh hian biangah lunglen mittui a luang a nih hi, ngawi renga thlir bak tih theih nei tawh hek lo le, hringnun hi a kim thei mawlh lo a ni.

Kum kal ta a kan buh vua te kha kohkir leh theih nise zawng, hringfa lêngte zinga ka rualpui hote hian min khan lo ve teh ang chu. Pathian malsawmna ka dawnte zinga hlu ber hriselna leh chakna chu hmachhuanin Buh kan han vaw tak tak mai a nih kha, pui hum hum tak hi a ni. Chutia buh ka han vaw tak takte chu maw, Samsona khan min lo thlir ve ta ni sela chuan elpui atan min huphurh ve viau ang chu. 

Mahni tawka chapo ve arh ṭhin, ni mah sela, Pathian dah pawimawh hmasa ve ber ṭhin tho si kha ka ni ve bawk a, chhuan hranpa ngai lo hian mahni leh mahni kha ka inchhuang ve tawk a tin ni. 

Engtik lai maha ka nghilh loh tur leh Nausen ka nih lai aṭanga thlantla ve hluam a ka theih tawk a, No 1 lek aṭanga ka puitlin hnu a Bag 1 thlenga ka lo hahpui ve ṭhin tun thlenga ka thinlunga riak reng tawh tur, Puar leh fànna, chakna leh nunna atana kan nitin mamawh chu Buh hi a ni ka ti ṭhin a, ka la ti reng bawk. 

Kan sawi hmaih hauh loh tur pakhat chu hei hi alawm, hringnun tihlimtu leh kan game pakhat pawimawh em em mai chu, Pawhfan chu leiin kan chepte a, Vaithang kan han siam a, thlawh laia zu va te sah kawng ṭumah chuan kan han vit a, buhbawl chhehkhawm chu Dàp ngei mai a hung kualin, a kua kan han rek a, chutah chuan vaithang chu kan han vit leh bawk a. 

Zan dar 10 vel a lo ri ta maw tihah Thang chu en kual den denin pawhfan hmawra thirzai leh thirlen kuala Zutea Ha hmai lang ṭhiauva lo inchilh bet ràn chu la in kan vit phun ṭha leh a, a awk hmasa chu puahin kan han rep mawm hlap mai te chuan ka lung hi an dum zo ṭhin a ni. 

Khua a lo var a, Vai Pathian thawh hma ngei mai chuan Sava chitinrêng mai te chuan anmahni hram dan ṭheuh chuan an hram a, an thawm ri va te chuan min ti harhin kan han ṭhu chhuak a. Thlam luhka kan va chhuak chu zing daifimin changel hnah vel a far huh chup mai chu ni chhuak engmawi tak chuan a rawn chhun tle sur mai a, a hmuhnawmin boruak a thiang thei kher mai. 

Ei kan han rêl a, Tukṭhuan ei a hun ta maw tih chuan Tapchhak hnaih lamah chuan Changel hnah kan han phah duai a, Zo buh (Buh thar) ngei mai chu kan han bun khu vut vut a. Buhtlei chuan kan hawlh darh kual vel a, a rim te chu tui vawng vawng tak hi a ni. Rilru dam tak chuan Bel dum hlarh mai leh a chunga Zo Anthur hnah lo lang chu kan han thlir a, chheiraw tih pah chuan Tap bula ṭhu hian chu Bel dum tak aṭang chuan Zupawl Pum chhum Lian ṭha zet zawt mai hi an rawn bun tlawn ta zuarh mai a. An rawn ṭhen mawm hlarh a, a lian ber chu la in, a pa tiltawh tih hriat ngawih ngawihte chu an Vaibel dáwn dotu pahnih mar awt chuan kan han kaih sawk a, a tui dan a dang ṭhin kher mai - kan nun ti kimtu pakhat zawng a va ni si em. 

Pawltlak thla, chawlhkar hnih hnu velah chuan vahbak ram thlira Sa hnu hma chhui pah a, vak kual chuan Ringthar turte chu kan han dap kual leh a, lungdam tak chuan kum chu kan herliam pui ve leh ta ṭhin a nih kha. Tun thlenga ka lung min lentu, ka chhungril hlimna thlen ṭhintu ila ni reng a sin. I tel lova awm thei lo Hringfa te hian kan thlah thei lo che, chakna leh nun nân kan mamawh che asin...