Dân leh mipui

Dân hi mihringte zalenna leh ralmuanna siam saktu pakhat a ni a, Bible-a kan hmuh dân chuan “Nimahsela Dân avânga hriat ni suh se la chu sual ka hre lo tur” tih leh “Dân chuan awt suh ti suh se la chuan awh hi ka hre lo tur” tiin a ziak a ni. Tichuan, Dânin a khapte hi sual an lo ni tihna a nih chu. Dân hi zawm tûra siam a ni a; nimahsela, zawm har tak a ni.

Dân hi mipui tih-zalen nân a pawimawh a, kawng tam takin mipuite a vêng thei a ni. Dân hian mipui-te khawsakna a vên mai bâkah thil sual remkhâwmtu atân a pawimawh a, chu-vangin, mipuite hian Dân hi kan hriat a pawi-mawh takzet a ni.

Mizote hi thubuai neih chîng tak kan ni a, ni tin hian Court-ah kan thubuaite ching fel tur hian kan kal a ni deuh ber mai. Kan Mizo rilru puthmang han târlang lawk ila. Dân hriat a pawimawh hle nia kan ngaih ṭhin dân chu Dân hmang vêka chin fel chi thubuai kan neih hun hi ni berin a lang. Hetih hunah hi chuan a lo tlâi lutuk tawh ṭhin.

Mi tin hian buaina kan tâwk thei ṭheuh a, miin dân ang taka a tih hian mi hêk chîng leh mi ti kher kher angah sawi mai kan chîng a; chuvangin, mi piangthar ṭha tak tak Kohhranah pawh rawngbâwlna pawimawh tak tak chelhtute hian court hmaa thu dik tak kan âu chhuahpui ngam hi a pawimawh khawp mai.

Dân kan hriat loh avânga pawi êm êm ṭhin chu kan chanvo tûr liau liau Dânin min phalsaksa reng kan chân hnem ṭhin vang hi a ni. Mipuite hian Dân kan hriat tam tâwk loh chuan kan ram rorêltute hian thil dik lo tihna remchangah an lo hmang ṭangkai ve thei a ni.

Dân hriat thu hla-ah hian mipuite hi kan fimkhur a ngâi hle. Dânin thil a tih-theihzia kan hriat a pawimawh. Dân hi a chhawrtute tân lo chuan hriat ve vek a harsat avângin a lekkawhtute pawhin an hre vek bik lo a ni.

Kan khawtlâng hruaitute hian Dân leh Hrai chungchângah khawtlâng mipuite kan inzirtir thar hi thil pawimawh tak a ni tin kan hriat a pawimawh. Dân hmangin Zoram mipuite hian kan ram chhe tawh tak hi i siam ṭha ang u.

"Tichuan, i laka lo la chhuak tûrte chuan hmun hlui chhe tawhte chu an rem leh ang a, chhuan tam tak lungphumahte chuan i rem chho leh ang. Tichuan, nang chu a chhe lâi siam ṭhatu mi awmna tûra kawngte siam ṭha tur an ti ang che.” (Isaia 58: 12)

- George L. Ralte, Nisarih Tlang