Tribal Super Star II

Hripui avanga kan buaina chuan ziaawm lam a la pan thei tak tak lova, beisei loh lam daih, boruak dang deuhin min lo chhem thut thut chang pawh a awm ta zeuh zeuh mai. Hna a thawh mumal theih loh va, a thawh theih chhung lahin kan kimki dúk a, kan hawi lam tur pawh a thlan fel hman tak tak loh, ei leh bar zawnna a mumal theih lo lai hi thil buaithlak tak chu a ni. Heng hi puitling chin kan buaina pui ber ti ila kan sawisual awm lo ve, kan tu leh fate tan tak hian he hripui leng hian a nghawng nasa a, zirlai tan zirna in a kai theih lova, thiam leh thiam lovin nu leh pate'n online class an tihpui a, online-a fate zir aia zir nu leh pa pawh kan buai cher cher ṭhin khawp mai. 

Zirna hi a ṭha, ram leh hnam hmel lanna a ni a, chutihrualin tuna kan fate zirna online class pawl hniam zawkte phei hi chu nu leh pa zawkin hman kuma an pass tawh kha tlema changkang deuhin an zir nawn ni leh mai hian ka hre ṭhin. Hetiang ringawt chuan naupang ṭha, lehkhathiam inchher chhuah a har dawn khawp mai, online-a zir chhunzawm nge ṭha ang a, engmah hi tih loh law law tih chu keini sawi phak rual a ni lo. Mi tam tak tan an eizawnna a lo ni leh a, mi chawbel tihtawpsak chu tu nge duh bik ang le. Nu leh pate pawhin kan fate ti hram hram tura kan nawr luih deuh chu a ngai a ni. Hman deuh a, social media kawt zawla ka hmuhah chuan, ‘online class kal an duh loh chuan eng ngati nge kan sikulah an luh tir kher, board in tih tur an tih chu zawm mai tur, tih ang zawnga ṭawngkam thlahdah an awm kha a pawi ngawt mai, tun lai kan school luh dante chu session ṭan hma daihin loh theih lovin luh leh kan duh chuan admission min tihtir a, hripuiin kan ram a thleng dawn tih kan hre si lova, kan luh leh duh chuan kan in admit mai loh chuan, online class i zawm duh ang em tih form fill-up tur a awm kher si lova! Mahse, tunah chuan sawrkar lam pawhin thuchhuah a nei ve ta, theih ang anga zirna kalpui hi a ṭul tawh a ni ang e. Kan ṭan tlan erawh a ngai khawp mai.

Hripui ringawt hi buaina a ni lo, a changin kan national highway kawng chhe lutuk vangin a nuar pawl an awm reng bawk a, a awm lo hran lo ve, hetiang kawngchhiaah hi chuan tute mahin an motor phal takin an tlantir reng dawn lo tih chu a chiang reng mai, tlangrama awm kan ni a, kham kar leh ram chhengchhe tak tak karah kawngpui tur kan ker chawp a, a ṭhen hi chu ṭha viau awm tak a nih rualin a ṭhen hi chu a siamtu contractor-in a bill a la zo hman ang em aw? Tihtur khawpa chhe hma te hi kan ram kawng hi a ni lawi a, kawngpui siam ṭha thiam sawrkar kan nei lo nge a ṭha leh a tlo siam ṭha thiam contractor kan la hmufuh lo zawk tih chu keini chhan thiam rual va ni suh.

Ni e, mihring hi kan inang lo hlawm khawp a, a ṭhen thuawih an awm laiin a ṭhen chu dan lo a ni tih an hriat chung pawh a, hremna hmachhawn ngam niawm taka dan bawhchhe lui hi kan awm reng bawk a, thu neitute’n min man hma chu dan phal loh pawh ni se kan tilui a, min man chiaha dan a ni tih hre lo pawh kan ram hian a ngah khawp mai, hrereng chunga tilui ṭhin te kan sawina a nih ber chu. Dan hriat loh hi chhuanlam a tling lo tih hre chunga dan hre si lova tisual ṭhin kan ni chung pawh a, ngaihdamna tawk nasa ber ram kan ni hial awm e. Heng vangte pawh hi a ni mahna, mipuiin dan kan palzut nia a lan leh ṭhin na, thuneitu lam pawhin dan ang takin keng kawh se kan fimkhur phah zel ang a, a va ṭha dawn si em. Mahse, dan hi kan hre lo em a, dan i bawhchhia tiin min hrem dawn ta se, zo lo tur fe fe kan tam leh viau lo maw.

Kan ram a te si a, chuta karah kan la rethei leh zui a, kan tharchhuah inhnemna tham a awm si lo, lakluh policy hi kan nunna hnar pawimawh tak a la ni chung hian, a chhunga chengte hnam dang thar chhuah vek ringa khawsa kan ni chunga kan la inngeih lo em em te hi a mak ve ngawt mai, ram leh hnam tana thawk ṭheuh ṭheuh kan politician-te zinga ṭhenkhat hi chu ui leh kel thlun pawlh ang vel an ni a, ram ka hmangaih kan ti ṭheuh si a, chuti chung chuang chuan kan hmangaih tana kan thawh honaah kan inngeih thei si lo, a thiam lo zawk hi chu an awm hi ka ring ṭhin. Mipui hnenah hnathawh kawr min dil a, mipuiin kan pe ta cheng a, pûk chawpa rorel chung si hian a ṭhen hi chu hnathawktu challang takah kan siam hi a ni ringawt a, inhmangaih leh indawhtawnna te, inzahtawnna te, thawhhona ṭha nei tura ke pente hi thil har tak chu a ni chék ang chu, kan ram hruaitu lu te meuh pawhin an theih loh chuan keini zat hnih hnuai lam tan chuan thawhhona ṭha te, mi zah derna te neih chu a har khawp ang, check gate ṭhenkhatah sum tlem te thamna pein phalloh thil kal tlangpui ta ang se kan dem thei ngawt lovang a chunglam an dik lova, a hnuai lam dik tura inphut hi a fuh ber lo. Entawn tlaka hnathawh kawr ha chunga hnathawh te hi kan zir a hun ta hle mai, nakina chhuan lo la awm tur, kan lu leh fate hnenah, ‘hei hi kan tribal super star a ni e,’ tia kan sawitheih tur hian he kan ramah hian kan ṭhat lai, kan vanglai hun hi i hmang ang u.