Kan sorkar hi harhvang lul teh se!

Kan sorkar hian hmasawnna lian tham (infrastructure) lam an thlen thei lo a nih pawhin ngaithiam ila, a phak tawk a ni ve mai. Mahse hun hmalam thui tak thlira kan khawpui chep lutuk leh Traffic jam nasa lutuk venna kawngah te, a mi chengte sahimna tur lam talahte hian rilru pe se ka va duh ṭhin tak em!

Tun aṭanga kum 10 lekah pawh Aizawl khawpui chep leh traffic jam nasa lutukin harsatna namen lo a thlen tur hi a lang chiang si. Tuikual - Vaivakawn kawngah hian a chep lai ber - kawng chhak lama lung bang thui vak lo awm hi Traffic ti jam-tu a ni fo a, motor lian phei chu an inpel hlei thei lo fo a ni.

Hman aṭang daih tawh khan helai meter 30 vel lek hi chu harsa tham a ni lo bawk a, sorkar hian kawng zauh nan han tuk thla sela, meter 1 vel chauh pawhin han tizau se a ṭha tur. Tunah hian tu-emawin a lai a, In chhawng sang tak a sa a, a sir/ thlangah a lai thla leh a, in a rel leh tawh a ni.

Hetiang a nih chuan helai kawng hi kumkhuain zauh a ni thei tawh dawn lo tihna a ni. Kawngpui hnaih em ema sak a nih bakah ADA/ AMC dan/ kalphung siam a kalh ka ring khawp mai. Sorkar hian hei hi a hmu lo nge a thlir liam mai mai?

A thuhrimah helai hmun dawt maia awm building te pawh kawngpui leh a thlanga chengte tan a hlauhawm tiin kum 5 kal ta velah khan Sorkarin ṭhiah turin thu a pe tawh a, vawiin ni thlengin ṭhiah a ni lo. Building dang sak thar hnawksak takte pawh a awm belh zel zawk a ni. Mimal ram pawh nisela Sorkar chuan kawngpui reserve a awm avang leh In sakna him lohna hmunah chuan In sak a khap thei a ni.

Tuikual bakah pawh hian Chanmari - Chaltlang kawngpui chhoah te pawh khian Sorkar hian insak khap sela a ṭha tur a ni a, mahse pip-e-pup-e a ti ngai lo a nih hmel. Hetiang ang thil ṭul leh pawimawhah pawh Sorkar nei lo ang mai kan ni ṭhin hi a lungchhiat thlak!

Sorkar hian hmalak a tum lo a nih pawhin ram hmangaihtu mi-pui-te hian khap dan ngaihtuah mai a ṭha lawm ni?

- Zohmangaiha