Traffic Jam ka tawng ve ta

Pa phunchiar satliah ang mai mai tura ka ngaih chu Aizawl khawpui kawngpui lûn laiah ngei mai a chhan dang ni miah lo lirthei pahnih an intawh len loh avangin Ramhlun North-ah traffic a jam tlat a. Chumi kan tlan pel leh chu Ramhlun Venglai leh Ramhlun South inrina velah a jam leh a, Ramhlun North leh Chanmari inkarah hian minute 25 chuang ka han hmang tehreng a - hman ni chhunah.

Whatsapp leh Facebook ah ka lo hmuh fo chu Aizawla kawngpui lun ber pakhat anga sawi theih Ramhlun kawngpui pheia kea kalna footpath an siam thar hi a ni. Hei hi sawiselna awm mahse kei chuan ka welcome zawng tak a ni. Kea kalna ṭha a awm loh chuan khawpui hi a kim thei lova, kea kal mipuite ngaihsaktu hi an awm a ngai a, khawpui dang pawh hi en ila kea kalna hi an ngai pawimawh ṭhin tih chu kan hmu vek ang chu. Footpath an siamna kan en chian a kan hmuh tel tur erawh chu motor kalna lam ṭha takin a kal tlang tho tih hi a ni bawk ang a, kan sorkar hian Ramhlun pheia motor kal dan tur leh parking hi a chin fel vat a ngai.

Hriat ve chhun han sawi ila. Sikkim khawpui Gangtok-ah khian ke chauhva kal theihna bazar hi a awm a, a kal tawh chuan a nawm zia kan hre thei awm e. Mizoramah chuan kan Aizawl khawpuia bazar lun berah pawh rem leh rem lovin motor kal tlang theihna kan la siam ṭalh a. Chutah chuan zing leh zan lam­ah chuan motor an tlan ṭhin a, motor tlanna leh kea kalna hi rel fel vat chi a ni lo maw? Bazar lun laia motor lut hi chu bawlhhlawh phur bak ni tawh lo se a ṭha ang. 

Kea bazar huai huai na lam hi chu phaia khawpui-ah hian a tam a, a nuam kan ti  ṭhin a ni khual zin te pawn. 

Ka sawi kual vak chhan chu Ramhlun kawngpui phei hi a ni. Kea kal theih bawk a, motor jam lova an kal theih bawka siam tur chuan Imphal khawpui kawng zauh ang hian mimal in hi an lâk (hleh thlak) char char ngam a ngai a, chu mi chu sorkar hian a tih ngam si loh chuan motor parking tih bo vek hi a ngai ta niin a lang. Kea kalna siam hi chu thil ṭha a ni a, mahse motor a jam leh daih bawk si motor kalna tur chin an zuah a zim em avangin. 

Kawngpuiah motor tam vang pawh ni lo, thil dang vang pawh ni lova motor intawk leng lo avanga jam siam hi chu thil dangdai tak a nih avangin kan hotute hian Ramhlun road-ah hian parking hi khap tawh mai se a ṭha zawk lo maw? 

Taxi stand pawh paih a ngai ang a, dawr neitute pawhin an tuar deuh ang, mahse lo hrethiam hram hram se, footpath siam a nih tawh avangin a tih kawp vek theih loh a ni. 

Zarkawt leh Dawrpui phei pawhin an tuar ve deuh a, kea kal chu a nuam zawk lawi si a ni.