Seat duh chuan ZPM phawt a ngai!
Congress mi leh sa nghet tam takin MLA seat an nghah ve fan fan chu ZPM aṭanga bâng hlim pahnih hnena pek a nih hnu lawkah, MNF Chakma Autonomous District Council CEM ni thei Pu R Chakma chuan MNF chhuahsanin ZPM zawm a tum a, ZPM zawm tum chu MLA seat hmuhna a ni.
Kan thusawi hi fiamthu angin lang mah se thinrimthlak tak thil a nih avang hian keini ṭhangtharte hian i do tawh ang u. Political party worker berh ve te te chu thih ngamin kan lo inhauh laiin, kan pute zawk chu seat an chan duh chuan an duh duhnaah an kual an kual a ni. Congress pawh Party lian leh Upa kan lo tih ṭhin khan a party mi leh sâ ring zo lovin pawn lam mi pawh ni satliah lo, ZPM duh loh chu seat an pe. ZPM-in Pu Lalhmingthanga Sailo chu MLA Candidate atan an la duh lo va, Congress-in an lawm lut a; MLA seat an pe. Amah teh reng pawh hian principle a nei miah lo tihna a ni a, ZPM-ah khan seat hmu dawn se ZPM ruhkawl a ni ang a, tunah chuan seat a hmuhna Congress ruhkawl vawi leh khatah a ni ta thut a ni.
Hetiang case chiah chiah hi Pu Lalsanglura pawh a ni tho a, ZPM mi leh sa a ni a, ZPM ruhkawl a ni. A ZPM chhan chu MLA nih tum ve ngawr ngawr a lo ni reng a, seat a hmuh loh rualin ZPM aṭangin a chhuak a, Congress a zawm ta a, Congress-ah chuan MLA seat an lo pe ve mai a. He Congress hi Pu Hawla Congress kha chu la ni se, heti hian an inthleng nawi duh hian a rinawm loh va, ZPM duh loh èm lo lak luh chu a Congress tih chi loh khawp mai.
Chakma hi chu an hawi lam pawh a hriat loh va, Party hi an inthlak hreh lo. RM Chakma hi MNF pachal, CADC lama CEM ngat a ni. MLA seat a lo beisei ran ran chu mi dang an pe dawn tih a hria a; thurualpui neiin MNF aṭanga banna an thehlut thut a, ZPM zawm turin an inbe fel. ZPM an luh hma niin MNF hruaitute nen an indawr fel leh a, MNF aṭanga an chhuah tukah an lut leh a, an luh leh meuh chuan MNF Candidate nihna a luhpui. ZPM lama va chhuah zet hi MLA seat channa ṭha tak a lo nih hi. A ZPM lah hi MLA candidate thlak hmasa kha an ni a, Congress lamin an thlak leh a, MNF phei chu rei em em an ngaihtuah hnuah candidate thawm nei hak an rawn dah ta a ni. Politricks hi in hne ve tho lo maw?
- Maremmawia