Thlasik harsat chhawmdawlna
Fanghmirte hian thlasik atan kum tluanin chaw an khawl a, thlasik laia mu bo ṭhin, bak te, thehlei ṭhenkhat leh savawm kan tihte pawhin thlasik khaw vawt lutuk hi an mu bo ṭhin. An mut hun atana an taksa mamawh tur chu an ei khawl a, thau angin an dah ṭha thei ṭhin a ni. Siamtuin a siam dan rengah midang leh thil dang mamawh em em loin an dam chhuak thei ṭhin. Hetih lai hian mihringte erawh chuan thil siam dangte tihdan hi ti thei lo mah ila kan dam khawchhuahna atana ei tur lei nan hian pawisa kan mamawh ve thung a ni.
Sorkar hnathawk tan sorkarin sum a neih phawt chuan thla khat atana ei leh in tur chu rilru hah lutuka ngaihtuah ngai loin a awm leh thei mai ang. Sumdawng zingah pawh thlasik a niha thlasik thawmhnaw zuar thei tura an nipui thawmhnaw dah ṭhaa thlasik thawmhnaw zawrh tur la leh mai thei tan chuan tihdan a la awm zel a, nitin mamawh zuarte phei chu mihring kan thi puk a nih lem loh chuan an sum lak luh a la ṭang mar thei deuh zel awm e. Infiamna hmanga ei zawngte pawhin a hlawma sum an lak luh ṭhin avangin an mamawh khawp nei tura ngaih an ni. Hetih lai hian kan zinga khawsa ve si, kan hmuh hmaih ṭhin, hun leh thla a hera an eizawnna, an dam khawchhuahna a nghawng mihring an awm.
Nipuiah chuan ice-cream/vur hralh a nuam a, ice-cream/vur chauh zuara khawlaia vak kuala eizawng ṭhinte pawh an awm. Eng zat chiaha tam nge an lak luh a, eizawnna atana innghahna tlak a ni em tih erawh zir chianna ka neih loh avangin ka hre lo. Thil chiang tak pakhat erawh chu thlasik a rawn her leh anga, fur lai pawha an hlawkpui tawh loh, nipui laia ice-cream/vur chauh zuarte khan an eizawnna thlak turin sum an nei si lo a, kan taksa vawng dai tura ice-cream/vur lei kha tu mahin kan mamawh tawh lem si lo. An dam khawchhuahna atan an sum mamawh hmuh chhuah hi hengho tan hian a va har dawn em! Chu chauh a ni lo, labour kan tih, mi in saknaa inhlawh ṭhinte pawh hian, Krismas boruak avanga in satute rilrua chawlh a rawn thlenin an hnathawh ni a nghawng a, an mamawh khawp an la lut hman lo fo. Krismasa chhandamtu lo thlen nghahhlelhna ai chuan kum thara inhlawh lehna hun awm tur chuan an rilruah beiseina a siam nasa zawk ta ve ang.
Hengte hi mi tam tak an ni lo, chhiar tham lek leh zawn chhuah tham lek an ni. An tlem avang erawh chuan kan khawngaih lo bik tur tihna erawh a ni chuang si lo. Sorkar hian an tan tihtheih a nei a, dam chhunga chawmna lam aiin an thawh theih loh hun chhung atana an mamawh an neih ve theihna tur, 'Thlasik harsat chhawmdawlna' policy te hi a duh chuan a duang thei em em ang. Policy lianpui, hlawhtling thei lo neih ai hian ram hian kan changkan phah zawkin, sorkar pawhin a hming ṭhat phah zawk ngei ang. Nachang hriate'n an tih mai hi a tawk zo ṭhin lo a, ram rorelnaa tel ve leh innghat tlat, heng mi te berte chunga tih hi sorkar mawhphurna pawh a ni ve tho a ni. Heng mite hian a thla biin hlawh an nei ve si lo a, sum hlawm hmuh tur an nei lo a, hun danglam mila an eizawnna thlak turin sum an nei hek lo. Thlasika an harsatna chhawmdawlna tur hi ngaihtuah a ngai a ni.
- Lalrinfela