Nuai 3 Intiamna Thusawi Kha

Kum 2018 inthlan hma khan MNF President Pu Zoramthanga khan cheng Rs 3,00,000 min tiam a, NLUP dawng tawh zawng zawng pawhin Rs 3,00,000 an dawn vek tur thu a sawi a. Kha video kha an cut tawi a, a hma lama a sawi mahni loa feh chunga Rs 4,000 dawn kha kan lo theihnghilh hman tawh em?

Pu Zoramthanga thusawi kha a ngai ngaiin heti hian ka rawn type chhuak a, a video pawh ka nei a, in phone ah pawh khan a awm ve fur ang. Mizo mipui min tiam kha kan la theihnghilh thei lo. A hnuaia mi hi a thusawi ang ang type chhuah a ni:

"Ngaithla ṭhap rawh u aw... Kan Sorkar huna kan tih dan tur :

Ram nei chu in ramah khan in ṭan ang a, a nei lo ram kan sem ang a. Tichuan Feet 15 danah in lai ang a, khami in laih man kha a pawisa-in kan pe vek dawn che u a ni."

"Lala chuan a lai zo ta a, khur 400 hei cheng sang chuti zat an lai zo ta an ti ang, a bak kan pe ang che u. Lo vah man kan pe leh ang che u, tichuan in han hal ta ang a; March ah. Tichuan a phun tur chi, raw chi emaw rubber a nih chuan rubber pawh a thlawnin kan pe vek dawn che u a ni. Chumi in thlawhfaina tur chu, in tin kha tlatin Rs.4,000/- kan pe dawn che u a ni."

"Kum nga chhung chuan, a bul ṭan nan leh thil dang nen Rs 3,00,000 in hmu ang. Rs 3,00,000 aia tlem lo, Rs 3,00,000 chung lam in dawng dawn a ni. NLUP hmu tawh zawng zawng pawh kha project a, khami aṭang chuan in hmu nawn vek ang. Sorkar hnathawk MR hnathawk hi in ni nghal vek, chutah in office-a in hnathawh tur chu... Nangmahni Lo a ni lehnghal."

Heng thu hi 2018 inthlan hmaa tuna kan Chief Minister thusawi hi a ni. Inthlan a hnaia thil an semin an hawng nasa bawk a, MNF President intiamna ngei hi mipuiin i hre nawn leh ang u khai.

- Zonunsanga