Mizoram hruaitute "Ram hruaitu ropui" an nih ve theih dan kawng ka dapsak chhin a

Khawvel ram hruaitu ropuite:

Khawvel ram hruaitu ropuite chanchin hi ziak hmasa dawn ta ila, an ropuina chhan ber chu an chenna ram leh a chhunga cheng, ram mipuite an hmangaih em avanga rethei ngam khawp a, theih tawp chhuaha ram leh hnam tana thawk ṭhin, an lawmna pawh an hnathawhah kan tih ṭhin te hi, ram hruaitu ropui an ni ṭhin a.

Ram hruaitu ropuite zinga ka ngaihsan ber pakhat Lee Kuan Yew, Singapore Prime minister chanchin hi kan sawi hmasa teh ang..Kum 1980 chho vel khan, ram hruaitu leh thuneitute eiruk leh hlep ruk (Corruption) nasat lutuk avangin Singapore dinhmun chu chhe tak a ni a. Ram mipui an mangang a, mi rethei tamna, kut dawh tamna, pawikhawihna hluarna hmun, chenna tur nei lo tamna, mipuiten rilru fim pawh an pu zo lo. Singapore khawlai pawh a ṭawphnawk hle a.

Huaisen tak leh retheih ngam khawp a, ram mipuite ṭhatna tura dingnghet ngam Lee Kuan Yee a lo lang a. Kum 1959 June Ni 5 aṭanga Kum 1990 November Ni 28, (Ni 11499) thleng Prime minister nihna a chelh thei a.

A hmalakna vangin Singapore chu khawvela ram hruaitute eiruk kawnga fihlim an tehna ah, khawvelah pakhatna a nihtir thei a. Faina kawngah pawh khawvel ram fai thlanchhuah zingah lang ziahin, tun dinhmunah khuan Singapore a hlangkai thei a. Rei lo teah khawvel ram ropui berah a chhuak thei tlat.

Singapore University Convocation Dinner-ah thu a sawi a, "Ram hruaitu ramin hun harsa a tawh laia i hausa a nih chuan i damlaiin chil an chhak ang che, i thih niah lawm avangin an kut an beng ang," a ti hial a ni.

An hnathawhin mipui, mi harsa zawkte hnen a thleng pha a, ramin hma a sawn a. An ram mipuite'n an fak tawp theih lohna chu, ram tana Prime Minister rethei ber, Chief Minister rethei ber an nihna te a ni ṭhin.

*Mizoram hruaitute "Ram hruaitu ropui" an nih ve theih dan:*

Sawrkar ṭhaah chuan ramin harsatna a tawhin ram hruaituten mawh an phur ngam a, hma an la ṭhin. Hruaitu taima lo, hlemhletnaa fihlim lo, a ngaihna hre lote tan chuan mawhpuh tur zawn mai chu thil awl tak a ni ngei ang. Chhuanlama an hman ṭhin "Mipuiin an zir lo" tih hi ram dangah chuan sawi ila min nuihzat mai thei, leader nei lo Society emaw min tih hial a rinawm.

Lal taka awm a, mipui che vel thlir mai maitu ram hruaitu kan neih chuan, mipuite chu kan hawi hai vel mai mai dawn tihna a ni.

Hruaitu mawhphurhna kan sawi avangin mipuiin tih tur kan nei lo tihna a ni lo, ram hmasawnna hi Sawrkar leh mipui ṭanrualna aṭanga lo awm tur a ni, pawimawh zawk erawh an awm tih kan hrethiam thei ang.

Tuna Mizoram dinhmun chu kan hre ṭheuh ang, kan ram hmalam hun tur ngaihtuah chuan kan mangang tlang chu a nih hi maw.

Kan ram hruaitute "Hruaitu ropui" an nih ve theihna lai chu, kum 5 chhunga mipuite tana an tih tur leh an rawngbawlsak tur ti miah si lo leh, sum awm lo chhuan lam reng reng a mawhpuh tur zawng kual a, ramin hma a sawn phahna tur pawh ni lem lo a, mi dang sawisêl reng renga hun an hman liam laiin, inthlan dawn hma thla hnih khat awmah, kum 5 chhunga an tih theih loh an ti thut thei ṭhin hi an "Ropui" ka tih ve theihna lai a ni. Inthlan dawn hmaa hnaruak hnawh khah thut te, tuizem sem te, bial mipui hmangaih thar thut te, chhûngkhat Sawrkar hnaa thun thut te, Sawrkar Schoola hlan kai thut te, damlo ngaihsak thut leh damdawiin chei mawi thut te, infiamna kawnga ṭhalaite ngaihsak thut te, thut a ni vel vek mai. Inthlan dawn hian ram hmangaih thut, bial mipui hmangaih thut theihna an nei hi "Hruaitu Ropui" an nih ve theih na lai a ni.

"Hruaitu ṭha chu mipuiin an hruai tur a ni lo a, mipui a hruai tur a ni".

- VL.Thlamuanpuia (@mizoram_au_aw)