RORELTU Versus TLAWMNA NUN
Roreltu thlang tlingtute zingah a tam zawk chu chhungkaw rethei eizawnna harsa tak tak te, nun dik loh avanga mi sawisel fo te, mahni insit avanga inkiltawihte, in enkawlna tur sum nei zo lo te, chenna tur in nei lote an ni.
Roreltute chu an lo chhuahna a tlawm em avangin chapona nun aiah tlawmna nun chu an nunah an lantir a ṭul a, an lantirna hmun tur chu mipuiteah a ni.
Heng servant of God, Lalpa chhiahhlawh sakhaw hruaitute, Govt Servant sawrkar hnathawkte, Public servant, mipuite chhiahhlawh politician te chuan an chunga mite thupek anga an awm in, an inhriat loh laiin chhiahlawh hna an lo thawk reng tawh ṭhin. Heng mi pathumte hian khawvela hna ropui ber chhiahhlawh nun chu an ṭawm thiam a, mipuite hmaah ram tan servant an nihna an tihlan thiam chuan chu chuan an dinhmun a tinghet zel zawk dawn a ni. Tlawmna nun tel lo rawngbawlna chu ṭha mah se thinlung a hneh thei lo.
Heng mite hi a tirah rinawm tura lak ni mah se, a ṭhente chu an lo rinawm lovin an inthlahdah tial tial a, an induhin an chapo a, an lo duhamin mahni hma an sial a, mi chanaite pawh an lo eiru duh hial ṭhin. Democracy ramah chuan mipuite hmachhawntu an nih avangin anmahniin ṭha inti mah se, chu'ng mite chu an lo chhinchhiah reng ṭhin. Mi dangte tana thawk tur an nihna an inhriatchian loh chuan mite tan an thawhlaiin anmahni tan an thawk tel fo ṭhin. Mi dangte thilṭha lo tihsa chu chhunzawmsak an hreh ṭhin a, an lalna bial chauh duhsak biknate chu an tuina zawng a ni.
Hetiang thil tihna hi ram ṭhanmawhbawk a ni a. Kan ram te reuh te hian duat taka enkawltu hmangaihtu tak a la mamawh a. Ama hminga ṭanpuina lo kal vete chu mi tlem teten an sàwk thla liam liam a, a hming maiin an thawk a, an ei zo zel ṭhin. Zoram hi natna khirh tak vei ang a ni a, chhanchhuaktu a mamawh reng a ni.
Inthlan dawnah chuan Politician te chuan an thawmhnaw hak; necktie leh kawrchungte chu hlipin hnathawh kawr an ha a, vantlang hmaah zuk kalin mite hip nan chhiahhlawh nun an zuk zir ṭha leh ṭhin. Mahse, rei tak zuk awm peih erawh chu an vang hle. Chu chuan politic chu drama-ah a chantir leh ṭhin. Thlantlinten VIP Motor nen kawtthlerah an tlan vung thuak thuak a, biak phak an ni tawh ṭhin lo. Ennawm mak tak an tling thei chuang lo a ni.
Ram hmangaihtu roreltu chuan ram tan a nihna sang tak chu a theihnghilh a, dikna leh rinawmna a vawnte chu ram tan a hlan a, mi zawng zawng entawn turin a hun tam zawk ram tan chhiahhlawh nun a ṭawm a, hnathawh kawr a ha chawt ṭhin.
- H. Neihchungnung, Durtlang North