In ṭawngkam hian bei lêt che u rawh se
Kum 2018 inthlan dawnah Rs 3,00,000 min tiam a, kan beisei leh phût miah loh kha Pu Zoramthanga khan min pek a tiam. Rs 3,00,000 chu kan duh ṭheuh avangin a hmaa MLA motor khata chuang tawk lek nei MNF kha kan thlang tlinga Rs 25,000 min pek avangin min hmusit hle a ni. In ṭawngkam hian ṭhing lèt che u rawh se.
Pu Zoramthanga ngei hian, "NLUP dawng tawh zawng zawng pawhin in dawng vek ang," tiin SEDP chu mi tin huap a ti. Tunah chuan SEDP dawng turin MNF Unit-in anmahni hnena inziak lut chiah an thlang. SEDP chu Rs 3,00,000 ni lovin Rs 25,000 a ni ta. Inbumna rapthlak tak a ni. Mipuite hi dawt hrilh mai mai tur kan ni reng em ni?
MNF senior zawng zawng tlan khalha a duh hun huna khuallian tur Chief Minister pawh sawm chhuak thei Pu Robert Romawia Royte chuan Rs 3,00,000 an sem ngei tur thu a sawi a, a sem theih ring lo tute chu a hmusit em em a, "Mawl" tiin a deuhsawh. Rs 3,00,000 an sem leh si lova mipui hian Minister zawk hi mawl an ti lêt ang. Mawl han tih dawnin a fing riau ang lawi si a, Aizawl East II lamah a tling zo dâwn lova a hriat avangin Tuikuk vote tamna Hachhek lam a pan ta.
January, 2019 khan kawng chhawng siamna chungchangah Union Urban Affairs Minister Hardeep Singh Puri chu Chief Minister leh Pu Robert Romawia hian an hmu kha a ni a, Pu Robert Romawia thusawi, "Ni 700 chhungin strategic location-ah eng emaw zat chu kan siam hmanin ka ring," tiin kawng chhawng siam dan tur a sawi a, a sawi dik lo hulhual. Covid-19 puh chi a ni lo, Covid-19 a lêng chungin phullem hi mamawh aia tam phah a ni. Hei dona atan a ṭhat thute pawh kan sawi em ni kha? Mipuite hi dawt hrilh mai mai tur ka ni reng em ni?
Assam Rifles sawn chhuah thu hi tu tu nge sawi kha? Chief Minister berin kum 2019 March 1 Chapchar Kutah khan kum 2020 Chapchar Kutah chuan AR chu Aizawl aṭanga sawn chhuah tur thu a puang a, a thleng dik lo.
AR sawi takah chuan Lunglei Municipal Council inthlan dawn boruakah AR an chhuak tak tak dawn an ti. AR-ho lirthei kal vêl dan tur lehkha pawimawh chu a 'Leak' ta tlat a, security thilah pawh leak chi a ni lo chung khan ti leak chàk an awm tlat. An chhuak dâwn tak tak emaw kan ti hman. Minister Pu Lalruatkima phei chuan AR chhuah tur thu uar taka sawiin an kelsa kanna bel leh atta nuaina nen lam an chhuahtir tawh kha a nia, tunah pawh an la chhuak si lo. LMC inthlan dawnah thu chiang lo an aupui dum dum duh. Mipuite hi dawt hrilh mai mai tur em ni dawn le?
Mau chungchang heti khawpa an sawi nasat chu a reh hmak tawh. Mau hmanga intodelh an awm lo, mau chi supply hmanga hausa an awm. IAS pawhin hna bansan phahna tur khawpa ṭha chu kum 5 chhungin achievement sawi tur a awm lo. Mipui pawisa a luang ral a, mau chi supply atan pawisa a kal ral, supplier an hlawk ta a ni. Mipuite hi dawt hrilh mai mai tur kan ni lo asin.
- Lalrinkima, Bawngkawn