Sunday-a vote chhiar eng nge pawi?
Mizoram Kristian zaah za awmna kan ti a, Kohhran leh khawtlang pawl hrang hrangte'n kan Kristianna kan la lungrun em em a; India Ram zau zawkah sakhaw lian ber Hindu-te'n an sakhua an la vawng viau bawk a. Kristian leh Hindu hi kan sakhaw chawisan tumnaah kan inang reng.
Tunah pawh kan inthlang dawn a, vote chhiar hun tur thlengin Election Commision chuan a rawn bituk a. December 3, Pathianni-ah vote chhiar hun a ruat a ni. Hei hi Kohhran hrang hrang inzawmkhawm, Mizoram Kohhran Hruaitu Committee te, inthlan laia thil dik lo veng tura din, Mizoram People's Forum (MPF) te leh political party tinte'n sawn turin an ti a ni.
Kristian sakhua hi dik berah kan inngai a, Hindu sakhua leh sakhaw dangte chu Pathian ring lo mi niin kan ngai hmaih bawk. India ramah Hindu an lianin an tam ber a, Hindu ram kan ni ber e. BJP chuan Hindu vuak len a tum a, kan dodal nasa hle a nih mek hi.
Sakhua leh sakhua kan inepna karah hian Kristian chu dik berah ngaiin Lalpa ram zauh zel tumin India ram kilkhawr ber berah leh ram pawn thlengin Missionary kan tirchhuak mek a, tirh zel pawh kan tum bawk.
Sakhaw dang kan ngaih theih loh lai hian sakhaw dang pawn Kristian-te min ngai thei bik lo tih kan hriat a ṭha khawp mai. Missionary za tel fe kan tirhchhuah ang hian Hindu sakhaw vuantute pawh hian Mizoramah Hindu sakhaw vuan turin chak takin hma rawn la ve se, kan ngaih theih loh dan turzia chu sawiin a siak lo.
Tunah pawh ECI chuan vote chhiar hun atan Pathianni a ruat hi kan dodal viauna tur awmin ka hre hauh lo. Pathianniah pawh Pastor thlengin an zin chhuakin an rawn zin haw tho a lawm le. Kristian tlem te, uihum lek hi kan lo pawr ve em em a, hei hi chu a dik viau lo. State dang ruala December 3-a vote chhiar hi an sawn ka ring lem lo bawk. An sawn a nih chuan a lawmawmah ngai ila.
Pathianniah central sorkarin exam chi hrang hrang a buatsaih pawhin kan sakhaw puithiam fate thlengin Kristian intite paw'n exam loh hlauin an phet suau suau tho hi maw.
Pathianni ngatah Kohhran Upa kan thlang ziah a, vote pawh kan chhiar nghal a, zanah result an puan ve ve tho hi. Eng nge Pathiannia MLA election vote chhiar mai maite kan huat bik viau le?
- Lalkhirhvela