Khawnge Zalenna chu?

Mitin hian khungbeh emaw awpbeh emaw nih kan duh lo. Mihausa leh rethei, a lian leh a te ber thleng hian zalen nih kan duh a, kan zalen lohna hmun chu nuam kan ti thei ngai lo, chuvangin zalen taka kan awm theihna hmun chu a nuam kan ti mai zel.

Tun hma aṭang tawhin Mizo te pawh hian zalen nih kan duh a, tu awpna hnuaia awm mah kan duh ngai lo. Min awp tum tute chu theihtawpa lo bei let a, zalenna kan neih theihna tur a nih dawn phawt chuan lu chhum ban chhum huama lo do let ṭhin hnam kan ni.

Hun a kal hret a - Mizote zingah India awpna hnuaia awma inngai, zalen lo nia inngai leh chep nia inhria an awm, chung mite chuan 'Zalenna kan sual' tiin ram hnuaiah an rammu a, a nghawng chu na tak a ni.

Zalenna sualtu nia inngai leh ramu zingah pawh ngaihdan leh pawm dan a inang thei lo, a hunlai chuan inlungrual takin an kal ho pawh a ni mai thei, tun hnaia an thu vuakthlak dan erawh a inang lo hlawm ta hle.

Hmanni mai khan chief minister Pu Zoramthanga chuan zalenna sual lo nia sawitute chu zalenna sual laia tel tluan peih lote an nih thu a sawi a, a thu sawi aṭang chuan zalenn sual tluan peih leh a peih lo pawl an awm tihna a ni.

Zawhna awm ta chu, tute chuan nge a tawp thlenga zalenna sual a, zalenna sual tluan tute chu tute nge? tih hi a ni. India aṭanga indan tumin zalenna kan sual a, a tawpa kan hlawh chhuah chu ṭhenawm dangte chan ang bawkin 'State' a ni - independent chu kan hnaih lo tlang hle.

Zalenna sual tluan peih lo tia puh an awm a, a sual tluan an awm a nih hmel - mahse India aṭanga zalenna chu a awm a ni lo satliah lo a, India tlawnin kan in zin chhawk zut zawk a ni si, kan thawh chhuah ve aiin phai aṭanga sawi chhuak thiam nihte chu kan intihtheihna a ni mek zawk chu a nih hi.

Zalenna sual tluan nia kan inngai a nih chuan, kan thil sualah chuan kan hlawhchham chiang hle tihna a ni ang, a chhan chu an sual bera chu an sual chhuak miau si lo a. He thu inchuh hi chu awmze nei lo leh thu liam tawh mai ni thei se, ram tana rammu nge an nihna mahni tana rammu an ni tih pawh mipuite hian kan hrethiam chho ve mek zel a ni - zalen sa reng kha zalen lo emaw intiin kan lo sual hah chiam pawh a ni thei bawk.

Tunah chuan khawvel a danglam ta, duhin sual teh mah ila kan tan hian 'Indipendent' hi a hnai lo. Ṭawngkam thiam vanga sawi hnaih emaw, Pathian thu nena sawi pawlha sawi hnaih tum viau chi pawh a ni hran lo.

India ram state pakhata zinga mi kan nihna hi kan pawm a ngai a, chumi chu engtiangin nge ṭha taka kan enkawl theih ang tih hi a pawimawh zawk chu a ni. Ram leh hnam tana martar leh tuartute chanchin sawi reng chunga mipui chanai kan hui hreh leh chuang miah si lo a nih chuan, kan lenchanna hian tawp chin a la nei ngei ang.

Ram hruaituten hei hi hria se ka duh, an rorelna hnuaiah hian mipui hi kan zalenin kan hlim tlang em, tih hi. Rorelna hi a dikin a ṭha tawk em tih leh mipui mamawh kan pe chhuak em tih hi an inen a ngai. A nih loh chuan mipuite hian an lak aṭangin zalenna kan lo sual ve mai dawn a ni. Chuan, November ni 7 hrereng ang u - he niah hian mipui rilru chu kan hre mai dawn a ni.

- Sanga, Aizawl