MSSSB HIGH SHOOL TEACHER HNA LAK DAN HI

Tunhnai MSSSB in High School Teacher hna lak exam a buatsaih dan hi a mak ang reng hle mai. Ka hriat ve chinah State dangahte leh Central hnuaia High School chin zirtirtu an lak dawnin General ang tawpin an la ngai si lo va, Mizoram sorkar hnuaiah hian eng vanga General Teacher anga la tlat nge an nih ang? High School chin tawhah hi chuan an zirlai (Subject) te a level a san ve tawh avangin Zirtirtu pakhatin Subject engpawh la thei tur hisapin recruitment an ti ngai lo. Specific Subject teacher tur ang te tein an la ṭhin.

MSSSB-in HS Teacher a lakna tura a Syllabus hi han bihchiang ta ila (A tawi zawngin) :-

Paper- I

General Knowledge - 100,

English-100 (200marks);

Paper-II

Basic Computer Knowledge - 100,

Simple Arithmetic - 60,

Reasoning - 40 (200marks);

Paper-III

Mizo-20,

Social Studies - 80,

Perspective on Education and Leadership - 100 (200marks);

Zirtirtu ni ve lem tur tan chuan GK leh English hi a pawimawh em avangin mark 100 ve ve an puttir hi chu a sual lo turah ngai ila, hei hi chu eng hna exam-ah pawh tel ngei ngei tura ngaih a ni. Mahsela, Computer instructor tur ni si lo, computer operator tur ni bawk si lovin mark 100 lai an puttir khi chu a awmang lo hle a ni. Chutihrual chuan tunlai khawvelah computer knowledge a pawimawh avangin 25 marks velte chu puttir mah se a pawi lo. Tin, Paper-II ah Arithmetic an rawn dah tel hi a awmzia hriatthiam a harsa hle a, Mathematics teacher an la dawn a nih chuan mark pu tam zawkin Technical Paper-III ah te khian rawn dah tel awm tak a nih laiin, an dah tel leh mang bawk si lo. Reasoning erawh khi chu mi thluak ṭha leh ṭha lo en nan a mark put zat zawng zawng nen khian a dik hle a, hei pawh eng hna exam-ah pawh tel tura ngaih a ni.

Tin, Paper-III khi zirtirtu ni tur tan chuan tel ngei ngei tura ngaih a ni bawk, Perspective on Education and Leadership (Pedagogy) lampangin mark 100 an rawn puttir pawh khi a dik thlap. Chutihrual chuan Social Studies/Mizo in mark 100 an rawn puttir hi Science background nei tan chuan a tam hle a, Arts background tan erawh chuan a tlem hle thung.

Ka sawi tum zawk tak chu elementary te a nih ngawt loh chuan General ang zawnga Techer hna lak hi a fuh lo va, kumina MSSSB in HS Teacher hna lak dan han ngaihtuah vang vang pawh hian SS leh Language teacher a tinzawn deuh ber niin a lang a. Mahsela, School ṭhenkhat zirtirtu indaih lohnaah eng Subject ah pawh, pawhpen mai theih hisapin syllabus ah Mathematics an telh a. Tin, Science Stream tan pawh dil theih vekin an advertisement an chhuah a ni ber a. Hei hi ngaihtuah chian chuan Science leh Mathematics teacher an lak dawnin Arts la tan a dil theih miah loh va, tunah Any Graduate with B.ed zawng zawngin an dil thei ta vek mai hi Arts subject la, Zirtirtu nih tum ve ngar ngar tan chuan a lungchhiatthlak hle a ni.

Mathematics thiam tan an subject ah an solid pawp theih laiin Arts tan erawh a dan a dang, mahni subject mah ni se General Awareness-a solid pap chu thil harsa tak a nih mai bakah, Mathematics hi an mahni vawchhetu an ni thei bawk. Chuvang chuan tlin leh tlin loh hriltu ber (Deciding Factor) chu Mathematics a nih leh hmel. Kumin HS teacher an lak turah hian Science leh Mathematics background nei an tling ṭhup ang a, Arts aṭang chuan mi pahnih khat vel bak an lang lo ang tih sawi theih pawh a ni ta lo.

Engpawhnise, sorkarin Zirtirtu a lak dawnin, a bikin High School chinah chuan a eng zirtirtu nge an lak tumah chiang hmasa se, Subject teacher a lak dan tur milin Syllabus pawh siam ni bawk se. Heti ringawta General Teacher tia hrut rual pawp ringawt hi world class education kan la hlat hle a ni. Dik tak chuan B.sc/M.sc (Mathematics) in SS subject a lak ai ngawt chuan BA/MA in mahni subject ngei mai S.S a lak chu naupang tan pawh a interesting em em zawk ang. A hnuaia mi hi tuna central EMRS hnuaia High School Teacher an lakna tura an syllabus a ni a, hetiang ang hian Mizoram pawhin an subject specific hi ngaih pawimawh ber leh mark pu tam ber ni se, kan zirna inin a ṭhatpui zawk ang.

- David Laldinpuia