Tute nge dawt min hrilh?

Ka huat em em chu dawt inhrilh hi a ni.

In bialah khan lo chik ila, 2018 inthlan dawna intiamna ang ti thei lo eng zât nge an neih? MNF MLA chauh ni lovin a Congress leh ZPM MLA lam pawh hi thil eng zât nge tih hlawhtlin loh an neih? Tute nge dawt sawi lo chhinchhiah teh u.

Inbumna thangah politics hi kan chhuah tur zozai tawh dâwn. Sorkar hna pe tura intiam hna hmù lo eng zât nge awm? Contract pek intiam eng zât nge hmu lo che u? Mizoram politician zingah dawt intiamna hmanga politics khel hi an tam lulai tawh a, zak ve em em tawh se a ṭha a ni. Kan politician zingah hian mipui hi bum theiha ngai, mipui pawh bum tawh ṭhin eng zât nge awm ang?

Nuai 3 min tiamtu khan eng zât nge min pek? NLUP dawng tawhte pawhin kan dawng ta em? Field chhawng kan hmu em? Khaw nge kawng chhawng chu? Ban pakhat pawh an phun hman ni em ni?

Kawng chhawng leh traffic jam awm lohna min tiamtute chuan kawng chhe takah traffic a ti-jam mêk a nih chuan mipui min bum a ni.

Assam Rifles chu an chhuak ta em? An gate an ṭhiat lai thlalak kha tu thehdarh nge? Zokhawsang lama lirthei lian tam tak kal tur lehkha kha tu nge tipût ru? Kelsa kanna bel leh atta nuaina nen Assam Rifles an chhuak lo a nih chuan min bum a ni.

Chapchar Kut kan hmanna hmun Lammual chu Mizote ta a ni ta em? A la nih loh chuan dawt min hrilh a ni.

- Lalhriatpuia, Salem Veng