Israel leh Hamas Indo

Kan hriat ṭheuh angin tun hnaiah Israel ram chu Palestine (Hamas hel pawh tia khawvelin an hriat lar) ten an beiin an run thut mai a. Israel lam pawhin chhangletin an indo zui ta a nih hi. Tuna an buaina ber hi chu October ni 7, 2023 (Inrinni) zing lam khan Hamas lam hian Gaza strip lam hnaia Israel ram chhunga an hnaih khuate chu rocket-in an kap chiam mai a. Ramrite a ruka kanin an bul hnaia khuate hi an run bawk a, Israel mi leh sipai tam tak manin an that bawk a ni. He inbeihna hi Hamas lam chuan Operation al-Aqsa Flood an ti a. Hei hi Israel lam chuan la thutakin inbeihna tenau mai maiah ngai lovin indona tak taka ngaiin a chhanletna tur, Operation Iron Swords a ruahman a. A ralthuam nei ṭha zawk, a tam zawk hian dim an tum lo hle mai a, mihring tam takin nunna an chan phah mek zel a. Eng tak ang zel ang maw le?

Hamas chu tute nge? : Hamas hi Palestine pawl pakhat, Hel pawl tia khawvelin a hriat lar em em an ni. Palestine-ah chuan an ram hmangaihtu political party pakhat, chak tak leh thiltithei tak an ni mai awm e. Anni hian Palestine ram tana nasa leh zuala thawh duh, Israel ram nuai bo a, Islam rama siam duhtu an ni. An ṭhahnemngaihna avang hian a chak viau reng a, kum 2006-a Palestine Legislative Council inthlanah (hei hi an inthlan hnuhnung ber a ni ta bawk) pawh member nei ngah ber an niin; Fatah party nen sorkar inṭawm an siam a ni. Amaherawchu, Palestine ram chhung buaina avangin sorkar pawh chu kal mumal lovin a awm zui a, Hamas-ho hian Gaza strip (khawvela mihring bitna ber hmun pakhat) bik hi awpin, vawiin ni thleng hian an thuneihna hmun a ni ta ni. Tuna Israel runtu pawh hi anmahni Hamas lam Palestine hi an ni a, kan hriat lar zawk tak Palestine thuneitu kan tih West Bank lama mite chu an ni lo tihna a nih chu.

Ui leh kelh thlun pawlh: Khawvelah hian ram, hnam leh sakhuate inngeih thei miah lo hi an tam khawp a. Chu'ng zingah chuan Israel leh Palestine te pawh hi ui leh kel thlunpawlh ang maia inngeih lo an ni a. Anni pahnih hi an chanchin hi chhui dawn chuan tun hma lam Bible hun lai daih aṭangin emaw chhui a ngai dawn a, ziah sen pawh a ni awm lo ve. Khu lai ram neitu leh luah hmasatu an nihna hi an chanchin hi sawi ve ve ta se la, tu zawk zawk pawh hi an dik ve ve ang a, a thiam zawk an ni ve vein a rinawm.

Pathian thu ang zelin tun hma lama Juda hnamte kha khawvel hmun hrang hrangah an vak darh ta chiam a. Khu Israel ram, Palestine ram ngei pawh khu mi hrang hrangin an awp kual hnuin British-in an awp hun tawp lamah, 1948 khan Israel ram chu a lo piang ta nawlh mai a. A ram neitu zawka lang Palestine mite chu mikhual awmin an awm ṭul ta a. Anni lahin an pi leh pute aṭanga an ram tiin an chuh nasa mai a, Israel lam lahin Bible aṭanga Pathian pek an ti ve tlat mai bawk nen. A rei tulh tulh a, Palestine ram chin chu a té telh telh ta mai a ni. Kum 1993 khan Oslo inremna tiin Israel leh Palestine lam thuneituten inremna siamah Palestine te chu a hrana inenkawl ve phalsak an ni a. Chu pawh ram khat anga awm siin hmun hnih, West Bank leh Gaza strip-ah an awm darh ta nuai tawh a. Tunah khuan Palestine lam khu mihring hi nuai 49 vel awm mek anga chhut an ni a. Palestine dinhmun hi independent chiah chu an ni lo, mahse tunah chuan thuneihna zau tak neiin independent angin an awm, mahse khawvel ram thiltithei leh hausa zawkte hian independent ramah an la pawm ve miau lo va, UN-ah pawh Observer status pek a ni hram a ni. Ram inchuha indo, ram chhana ṭang ve ve an ni bawk a, an ngam huaiin an inbei na thei khawp mai.

Khawvel ngaihven Israel leh Palestine: Sakhua, hnam leh thil hrang hranga inngeih lo ta chu vawiin thleng hian an la intibuai ta zel a. A té zawk Palestine lam hian an ram zawk nia ngaiin an kawlh fang a, Israel laka thih hi an hlau lo mai ni lovin, an châk zawk emaw tih turin Israel lam hi an huain an ngam ve bawk a. Israel lah hi mi kut thlawn ba ngai miah lo, ben khat a dawna hnek nga pe let duh chi a ni bawk a, vawiin ni thleng hian an buaina hi a reh thei lo a ni e. Israel hi hnam kawlhsen leh rawva tak an ni bik lo va. Mahse, muslim ramte zinga unau pui pawh nei avang hian an dam khawchhuahna tur atan hian theihtawk an chhuah a ngai a. Tun hma aṭang tawhin a ṭhenawm ramte lakah hian a kawlh viau zel a, ni ruk indo (six days war) ah pawh rapthlak takin an che tawh a nih kha. Ralthuam siam leh neih kawngah phei chuan ram lian tam tak aiin hma an sawn zawk daih reng a ni.

Palestine pawh hi khawvela hnam upa, khawvel huapa hnam hriat lar tak ni mah se, zalenna neia mahnia ro inrel an la nih ve loh avang hian khawvel ram tam tak hian zalenna an neih ve theihna kawng hi an aupui a, an thlawp em em a. UN member 193 zinga 138 (71.5%) te chuan independent ramah puangin palaite pawh an intir tawn a ni. Chutih laiin ram thiltithei leh hausaho hian Israel an lo ṭan ve tlat bawk si, independent ang tak chuan an la pawm tak tak thei lo a ni. Anni pahnih hi khawvel hian a thlir reng a, buaipui pawh a buaipui nasa reng a ni.

Mizote leh Israel: Mizo Kristiante thinlungah chuan Israel chuan hmun lian tak a chang ṭhin a, tun thleng pawh hian a la chang kan ti thei awm e. Mizo zinga tlema hausa deuh chuan ram thianghlim zin te neiin Israel leh a chhehvelte hi an fang awl lo va. Tlema duhthawh deuh phei chuan Israel hnam bo kha kan lo ni reng a lawm maw le tia pem thla tawkte an awm bawk a. Kan rilruah hian Israel hian hmun lian tak zawng a chang reng a ni. Mizo Kristian inzirtirnaah chuan Israel-te chu Pathian hnam thlan te an ni a, Palestine te chu Pathian hnam thlan te dotuah ngaiin Bible-a Philistia ho kha emaw tia lo haw deuh ngawtte pawh awm nual awm e. Chuvangin, Israel hi eng hnam pawhin do se, kan rilru hi chuan Israel hi a ṭan lo thei lo va, engtik lai mahin Israel hi kan thinlungah chuan a thiam lo zawk an ni tak tak thei lo.

Pu C. Rokhuma a ngaihawm Ṭhin e: Israel leh Palestine indo a lo thlen hian chuan famta (Upa) C Rokhuma hi a ngaihawm ṭhin khawp ngawt mai. Ani kha Israel ram ngaisang tak, Israel chanchin Zofate min hrilh ṭhintu ber kha a ni a. Israel chungchangah ngat phei chuan thu kha a uar thiam ve bawk a, amah avang hian Israel hi Mizote hian kan ngaisangin kan ṭan phah em em ni pawhin a lang. Vanneihthlak takin Israel ramah te a zuk kal bawk a, a ngaihsan a zualin ani zarah Israel chanchin kha kan hriat belh nasa viau a nih kha. Tuna Israel leh Palestine indoah pawh hian la dam se chu, a thu leh hla a ngaihnawmin Isreal ropuizia nasa takin min hrilh leh ngeiin a rinawm. An sawi dan chuan heti hian a sawi e an ti a, “Khawvel ram zawng zawng leh Isreal hi indo se la, tlang chhip sang tak aṭang hian en ila, a hmuhnawm ngawt ang,” a ti e an ti, tak tak ni maw. Israel-in khawvela chanchin thar a luah apiang hian amah kha hriat chhuah fo a awl khawp mai.

- C Lalengkima.