A ṭobul chhui la, fimkhur rawh u

Hman deuhah khan Mizo tlangval bright hmel zet hian Aizawlah sum peipun-na chi thar deuh hi a rawn introduce a, a sawi thiamin amah a smart bawk a, miin an bawh viau a. Mahse hun a lo rei deuh a, thil belhchian dawl lo a ni a, sum dahtu Engineer rual tam takin court-ah an khing ngam chiah si lova pawisa chan ta an awm nual tih mi rinawm takin min hrilh. A sum teltu hi an sawi danin a hausa hle a ni.

Khehpuam lar tak tak hma hian mi ṭhenkhat chu an lo khehpuam nasa hman a, an lian hle an ti. Sorkar hnathawk ṭhenkhat hi chu an pension hnuah Pathian thu luh chilh zui hle mahse miin an ringhlel tho tho a, eirukna nen an sawi zawm tlat avangin an ngaisang thei chuang lo an ti.

Sorkar hnathawk lai hausa ngat phei chu thil theih loh a ni, an hausak chuan an dik lo a ni mai. Mi hminga in hmun lei ching officer an tam hle a nih hi. Aizawla milian nia kan sawi leh kan fak tak luai luai ṭhenkhat hi an ṭobul leh an lo len tak hluai dan hi chhui chuan kan fakte hi fak loh leh mai tur an nih hmel an ti.

Hausa tur chuan hun a duh an tia lawm. Tuna kan mi hausa thana thang ta mi
ṭhenkhat hi kum 10 kal ta mai kha chuan mi naran ve maite an la niin an sawi a, kum 10 chhunga Mizorama mi hausa an nih phak chuan lunghlu an lai chhuak a nih loh pawhin rangkachak khur an nei tihna a nih loh pawhin sum hmuh dan fel tawk lo a inphum a nih rinna hi kei leh ka ṭhiante mi sual rual hian kan nei tlat a nih chu! Kum 10 kal taa mi narana kan ngaih, tuna Mizoram mihausa ni ta sawi tur awmte hi kei chu ka ngaih a ṭah thei lo nia mawle.

Mi hi tawngpawng fak suh u. Sum neih hnu chuan thil ṭha tih a harsa tawh lo. A nuam tawh lutuk tlat mai
ṭhianpa. Sum an neih dan hre chiang hmasa zawk teh u. An sum hmuh dan rinhlelh kai deuh hi chu fak lo ngam ila, thil ṭha an ti a nih pawhin, "Lan mawi an duh ve tawh a nih hi," lo ti fel ât mai ila.

Tuna kan kal zel danah hi chuan Myanmar lama kan khehpuam thawn chhoh lo dawng hma-satu ṭhenkhat hian nakin lawkah "Insuihkhawm" tih thupui nen 'thil ṭha' eng kawng zawng emaw takin an rawn ti ang a, kan la tlawnin kan la fak ang mawle. Khehpuam kher ka sawi lova, 'ziahpuam' an tihte pawh a awm a, document lem leh eng eng emaw hmanga inziak lian pawh kan chawimawi zel. Hengte hi eiruk tihbo tumna state-a thil thleng mek a ni. Chiahpuama hlawk hman kha chu tunlai ṭawngkamin an hausa bon top - kha kha a ni mai.

Mi hi tawngpawng fak tawh lo teh u. An
ṭobul chhui ula fim-khur hle teh u. Sum nei apiang mi fakawm leh chhuanawma kan chhuah chuan Mizoram hi tun hma Mizoram kha a ni tawh lo ang, i fimkhur tlang ang u - kum 10 kal ta khan eng ang mi nge an nih?

- Mamawitea