D i g i L o c k e r

Driving licence emaw Pawl 10 certificate a tak ngei nia lang (hard copy) an hmuh che ai chuan, DigiLocker kaltlanga heng document-te an lak chhuah kha a rintlakin a dik zawk fo vang. DigiLocker hi a ṭangkai leh a lo chhuahna a rei tawh ai hian hmang kan la tam lo va, mimal (citizens user) chu sawi loh, sawrkar leh mimal agency (issuer) digital document Digilocker-a dah nachang hria kan la tam tawk lo va. Tin, dah chhun ang ang pawh hmang ṭangkai tur requestor-te pawn nachang hre lovin, a hmaa kan lo kal dan ang thovin verification-ah te awlsam taka tih mai theih tihna chang hre lo kan la tam.

DigiLocker hi Digital India programme hnuaia Ministry of Electronics & IT (MeitY) hmalakna a ni a. DigiLocker hi digital document wallet (kan wallet-a id card hrang hrang kan zeh ṭhut ang khan) ti pawhin a sawi theih a, mipuite’n digital document dik leh rintlak kan hmuh leh hman ṭangkai theih hi a tum ber chu a ni. DigiLocker system kaltlanga document (soft copy) pekchhuahte chu Rule 9A of the Information Technology (Preservation and Retention of Information by Intermediaries providing Digital Locker facilities) Rules, 2016-in a tarlan angin original physical documents (hard copy) nen a inanga ngaih a ni, vide G.S.R. 711(E) dt. 08.02.2017.

A chunga kan tarlan tak ang khian DigiLocker hi MeitY-in Digital India hmalakna hnuaia digitization service a pek a ni. DigiLocker hmang hian document pawimawh hrang hrang digital version-a neih leh hman theih a ni a, chung zingah chuan driving license, lirthei registration certificate, academic mark sheet, ration card te leh a dang tam tak a huam a. Account nei apiang tan document scanned soft copy upload theihna tur 1 GB storage space DigiLocker hian a pe ṭheuh bawk a ni.

DigiLocker hmang tur hian Aadhaar number a neih a ngai a. Registration tih lai hian a hmangtu tur nihna (identity) chu adhaar nena thlunzawm mobile number-ah vawi khat hman theih password (OTP) hmanga finfiah a ni ṭhin. DigiLocker hi mi nawlpui hman theih tura chhawp chhuah a nih hmain, a enchhinna (beta version) hi February 2015 khan hman chhin a ni a, ti chuan mi nawlpui hman theihin Prime Minister Narendra Modi chuan 1 July 2015 khan a tlangzarh a ni.

A tirah chuan documents upload nana hmangtuten hmun awl 100 MB chiah an nei ṭheuh va, document pakhat hi 10 MB aia lian upload theih a ni lo. Tichuan kum khat chhung lekin kum 2016 July thla khan DigiLocker hian hmangtu maktaduai 2.013 a nei hman a, document maktaduai 2.413 lai dahṭhat a ni. Hetia hmang an lo pun hluaina chhan pakhat chu sorkar laipuiin municipal-te an hmalakna hrang hrangah paper (hard copy) aia DigiLocker a digital document (soft copy) hmang uar tura a ngen vang a ni.

Kum 2017 khan DigiLocker-ah hian Indian Certificate of Secondary Education-a zirlaite Class X leh XII certificate dah a ni. Hemi rual hian Kotak Mahindra Bank chuan DigiLocker leh an net-banking application thlunzawmin hemi kaltlang hian document te chu electronic hmanga sign leh thawndarh (share) theihna a siamsak a ni. Tichuan hemi kum vek hian Tata Memorial Hospital telin damdawi in 108 chuangin cancer veite medical document pawimawh leh test report dahkhawmna atana DigiLocker hman an rel a. He lam buaipuitu mithiam pakhat sawi dan chuan, ‘damlote chu number key pek an ni ang a, chumi hmang chuan an test report te chu damdawi in dangte pawhin awlsam takin an lo hmu ve zung zung thei dawn a ni,’ a ti.

December 2019 a thlen meuh chuan DigiLocker hian issuer 149 hnen aṭangin authentic document maktaduai 372 chuang a vawng der tawh a ni. A hmangtu pawh nuai za thum an chuang a, hei bakah hian requester organization 43 chuan DigiLocker aṭangin document an pawm mek bawk.

Kum 2023 aṭang hian India sorkar chuan Passport Application Form chu Digilocker nen a thlunzawm a nih kha. Kan tarlan tak ang khan DigiLocker in a tum ber chu document hard copy hman tlem tial tial a, chu mi hmanga administrative senso (expense) tihtlem a ni. Chutih rualin document dik leh dik loh finfiah leh a finfiah dan awlsam zawk siam te, sorkarina document a pekchhuahte dik leh awlsam taka hmuh theihna tur leh mipuite’n kan chanvo keimahni lehkha pawimawh reng reng awlsam taka kan hmuh hi a ni. Tun dinhmuna DigiLocker hmang (user) zat, a hmangtute hnena document pekchhuah (issue) zat, document pe chhuaktu (issuer) zat bakah chung document hmang ṭangkai duh (requester) zat a hnuaiah hian tarlan a ni.

Fig : DigiLocker hmang tu pun dan (b) DigiLocker a document dah te a pun chhoh dan

Mipuite tan DigiLocker hman a ṭhatnate

1. Document pawimawh DigiLocker kaltlanga kan neih te, engtik lai pawhin, khawi hmunah pawh kan hmang ṭangkai zung zung thei. Entirnan airport-ah i identity document thlalak i hmuh ringawt chuan an pawm kher lo ang, mahse i id eng emaw ber DigiLocker application kaltlanga i neih kha chu i hmang thei ang.

2. Heng digital document te hi a rintlak a, a chunga kan tarlan tak ang khan danin original nena inang tlanga a ngaih a ni. Heti chung pawh hian hmang leh nachang hria mimal leh sawrkar ang pawh a kan la tam tawk loh avang hian a ṭangkai tur angin a la ṭangkai thei lo.

3. Heng digital document te hi a neitu remtihna chauhva thil danga hman theih a ni. A awmzia chu i phalna la hmasa lovin i document neihte kha verification tih nan emaw, thil ṭul dang emaw atan an lo hmang ngawt thei lo tihna a nih chu.

4. Sawrkar aṭanga hamṭhatna hrang hrang te, hna zawn kawngah te, sum leh pai chungchangah te, zirna leh hriselna kawngah leh thil dang tam takah hman ṭangkai theih a ni.

Agency hrang hrangte tana DigiLocker hman ṭhatna

1. DigiLocker hian document hard copy original leh duplicate pekchhuah a tih tlem theih bakah chung document te a dik ngei em tih finfiah kawngah awlsam taka hman ṭangkai theih a ni. DigiLocker hmanna chang hria mimal leh sawrkar anga kan la tam loh avangin heng hi kan la hmang ṭangkai tawk lo hle a ni.

2. Document rintlak pek chhuahna a ni. Heng DigiLocker hmanga document pekchhuahte hi a pe chhuaktu hnen aṭangin direct-in real-time-a lak chhuah a nih avangin verify leh kher ṭulna pawh a awm loa ngaih a ni.

3. Document neitu remtihnain, document pe chhuaktu (issuer) leh chu document lo mamawh vetu (requester) inkarah payment gateway (keimahni leh kan bank account neihna inkarah palai hna payment gateway hian a thawk) ang deuhvin him taka document te hman kual theihna hmun a ni.

4. Sorkar agency-te’n document neitu phalna (user consent) an hmuh hnuah document pe chhuaktute (issuer) hnen aṭangin awlsam takin document a dik ngei em tih verify theih a ni.

Mizote’n DigiLocker a kan dah theih document pawimawh langsarzual te chu-

1. HSLC leh HSSLC document (2018 leh a hnu lama pass te)

2. Aadhaar Card

3. Driving License

4. PAN Verification Record

5. Registration of Vehicles

6. Insurance Policy Document

7. Ration Card leh a dang te

Heng documents bakah hian thil dang tam tak a la awm a, a langsarzual kan han tarlang mai a ni. Heng DigiLocker-a kan digital documents-te hi en leh awlsam taka inthawn theih a ni. A chunga kan tarlan angin a document original (hard copy) ang chiaha rintlak leh pawm tur tiin sawrkar thuneituin a chhuah kan tih kha. DigiLocker hi ios leh android application awlsam taka download mai theih a ni a, registration tih lai tak hian adhaar card number kha identity prove nan hman a ni. Adhaar nena kan thlunzawm mobile number-ah OTP a rawn thleng dawn a ni. A hman dan thiam lo tan youtube link kan dahah hian a en theih a ni.

- Dr. Jonathan Lalrinmawia, Academic Officer, MBSE