Khu tak mai hi a nia!
Taxi driver hnenah chuan ti hian ka hrilh a, "Chhangur kawn (Baker's Street a ni lo a nia) aṭangin kawngpui pangngai zawk (main road) ah peng loin i tlan zel ang a. Tichuan, metal loh chin i thleng ang a, chutah chuan High School veng i thleng ta tih i hre dawn nia" tiin. A ni tak a, in chung vaivut paw uk khak mai lo tlar tuarh chuan Luangmual High School veng a thleng tih a hriattir dawn a ni!
Tun china veng chhung inlungrualna ber chu zingkar leh tlai lam hun remchanga mahni in kawt vaivut theh huh hi a ni awm e. Kum thum dawn chu a ni ta reng mai.
Pitar nilum ai leh naupang tha za te pawh up bet a, khuahkhirh turin in tin kan inzirtir ta emaw tih mai turin mahni in chhungah kan inkhung ṭhap hlawm a. Loh theih loha chhuak turte pawhin lirthei kal loh hun kan chuh vat ṭhin.
Ṭhutna pindan phiahfai mek laiin a bula ṭhutthleng a lo paw leh phuk hman a. Chhun lirthei tam vanglaia thil zuar chi hrang hrangin kawngkhar an rawn hawng ve sek phei chu runthlak tak a ni.
Chhangchhe nuin a hruk fai hmasak tawh lam hrufai nawn leh tura nau paw chunga ṭan a lak mek laiin fa u zawkten kawngkhar an lo su hawng ve sek bawk a. Tu nu thin hian nge dawl seng bik ang le!
He kawng hi a khuk em avangin naupang hritlang a dam hman lo a, puitling pawh kan bang bik chuang lo. Nu ber lahin kawng khuk chhanah min hmer tel dawn dawn fo mai a, pa ber tan lah mahni in leh lo han rauh san zawnga thu vuak thluk chi a ni si lo.
Nau no pawm veng danga chhungte belh tur nei chu vannei tak an ni. Nitin maiin chhiatpui tham vaivut an hip lut reng a, zanlam motor tlem changa motor tlante lah ramhuai speed-in an rawn tlan tawh mai ṭhin a. Hui ha!
Fur ruahpui a rawn buak leh hman hlauh chuan kan tawrh tawh ṭhin ngai bawk kan tuar leh ang a; a khu kha a diakah a chang leh mai dawn a ni. Power House (P&E), FCI Godown, Mizoram University, Central Jail, adt. panna kawng pawimawh, 2 Kilometre leka thui siam zawh hleih theih loh hial a bul vela chengte min va tibuai zozai em!
'Kawng ti mami nu' leh 'hai theia' te kan hmuh khan kan thla a muang em em a, mahse kan tawrh hi a rei ta em mai.
A fawng vuantu kan hotuten he kawng hi rulngan pa ang hlarha an rawn luan hnum hlarh hunah, chutih hunah ngei chuan par kan chhuang ve ang chu. Beiseina nen kan thlir mek e.
- Robert Lalthanmawia, Luangmual