Ka vei ve thil ṭhenkhat
Mizote hi chu kan hnam la naupan vang a ni ber ang, hmalam thlir lawk thiamna hi kan la nei thiam tawk lo ni berin a lang. Kan Architect te leh Structural Engineer te, Sawrkar hotu leh politician thlengin sawrkar building sak thuah chauh pawh hian kawng an te hi chu staff-te leh office dawrtute tan parking-a plan nachang kan hre har lutuk a. Kan khawpui kawng a zim si a, office dawr duh pawhin parking hi a buaithlak em em ṭhin.
Assembly House
Assembly House pawh khawpui lun-laiah kan hung ngut a. Kan thlan lalten ro an rel lai chuan tun hma deuh phei kha chuan Assembly House zawn chu motor tlan tlang phal loh laite kha a awm ṭhin. Engemaw bik thilah kan politician rualte hi ven uluk bik ngaih hun lai awm thut phei se, ro an rel lai chuan Assembly House bul kawngpui hi chu mipui kal tlang theih lohin an la khar fo ta ve ang! Chuvang chuan he Assembly House hi chu New Capital lamah emaw khawpui chhung hulum lutuk lo laia sawn chi niin a lang.
Lirthei
State khat khawpui ve riang ruangah chuan lirthei pawh a pung ve zel ang chu! Kawng pawh a zauh theihna lai lai tih zauh te, mipui kalna bik tur siam te pawh a
ṭul reng ang. Hman deuh khan sawrkarin “Lirthei nei reng reng chuan garage neih vek tur” a tia. “Motor registration chumi chin chuan” an ti leh bawk; garage hi bawh zui tak tak a awm lo.
Taxi permit over khawpin sawrkarin a pe a, in tlan chhawk tir dan ruahman a ni a, a fuh hle. Mahse, an sut leh a, an ti nawn leh a, a ṭha e. Kan sawrkar milian VIP light neite pawh hi jam-ah tang ve mai ṭhin se, traffic jam hisapin an programme te pawh adjust ve
ṭhin se.
Private motor
Tun hnaiah traffic jam tih nepna turin taxi in tlan chhawk bakah private motor te in tlan chhawk tir chungchang sawi a ni. Heng private motor te hi mamawh huna a hman tura lei a ni ber a. Mimal motor leh zel in tlan chhawk tir dan hi thuneitute hian an siam a nih chuan mipui tan harsatna an siam thui khawpin a rinawm.
Kan ramah hian zalenna dika kan zalen hi a ṭha lo maw? Mipuite rights rah beh sak kawngah hian fimkhur a pawimawh.
- Madina pa