I VOTE VAWNGHIM RAWH

Rilru fim leh hriatna thiang tak neiten an kawl ṭhat tlat, kan Rohlu chu VOTE kan neih hi a ni. Kum tling lo, rilru kim lo leh mitthiten an neih phak loh a ni a, kan vannei hle a ni. Vote kan thlakna a dik chuan kan ram chuan hma a sawn ang a, kan thlakna a dik loh erawh chuan kan ram a tluchhe sawt dawn a ni.

Sum thiltihtheihna leh hman dik lohna te, ṭawngkam ngam thlemnaten i ngaihtuahna chu a rawn pawlh nut hmain i pindan chhungrilah lut la, i khum laizawlah i rilru fim tak chu hmang la, Candidate zingah Ram Hmangaihtu tur i duh ber hming chu thlang fel ang che.

Chuta ṭang chuan i vote hlu tak chu tu ma'n an tih chingpen theih lohna turin uluk takin thup tlat la, Secret Ballot Box i thlen hma chuan vawnghim tlat ang che.

Inthlan NI a lo thlen hmain kawng thui tak zawh tur i la nei a, bumboh tak takah i kal ang a, kalkawngah chuan thlemtu i tawk mai thei a, Iptepui khatin pawisa a rawn ak ang a, a ṭhenin development sum leh therhlote an rawn hmatheh ang. Chu'ngte hmang chuan i vote hlu tak chu rawn lei a, an duhna takah i vote hlu tak chu thlaktir che an duh vang a ni ang.Inthlan ni a lo thlen hma chuan lehlam hawisan zel ang che.

Ram siamṭhat nan Democracy ramah chuan vote kan neih hi kan rohlu ber a ni. Rilru fim tak hmanga kan duh kan thlan theihna hi mi tinten kan zalenna a niin, kan Right dik tak a ni. Tu m'a sawi buai phak a ni lo.

Vote hi hralh theih a ni lo a, lei theih a ni bawk hek lo. Thlemna i do zo lo a nih pawhin a tira i rilru fim hmanga i lo thlan fel tawh kha vote thlakna pindanah chuan hrechhuak leh ang che. Chu chuan mi rinawm i lo nih zia nangmahah i inhmu dawn a ni. Thlemna do zo lova a tawp thlenga kal tlangpuitu chu nakin hunah amahah miten rinna an nghat thei ngai lo ang.

- H.Neihchungnunga, Durtlang North