Eng vangin nge chhiah chawi kan hreh?

Ram changkang zawkte tih dan entawnin, chhiah chi hrang hrang, kan la hmelhriat ngai loh te pawh hi kan la chawi chho zel dawn niin a lang. Kan lo chawi fo ṭhinte pawh tihpun zel a nih a beisei awm.

Ram changkang zawkah chuan chhiah chi hrang tam tak an chawi a, heng an chhiah chawi tlingkhawm aṭang hian an khawpuite cheimawiin, thil chhen-fakawm tak tak sorkarin a ti ṭhin a. Chu chu an chen-nawmna tur a ni tih hriain mipui pawhin chhiah chawi an hreh hran lo a, i-he lovin an pe mai ṭhin.

Engvangin nge kan ramah hian, tuna kan chhiah chawi te pawh hi tam kan tih tlat a, na kan tih? Ni, a enkawltu ber sorkar hi mipuiin kan rin tlat loh chuan chhiah chawi chu harsa kan ti a, na kan ti hma em em a ni.

A nihna takah chuan chhiah te hi chawi hreh tur kan ni lo a, kan chawi ngei ngei tur zawk a ni. Khua leh tui
ṭha nih kan duh ve si chuan chhiah chu kan chawi mai turah ka ngai. Chhiah awl ruk te hi keini Kristian-te chuan kan tih loh tawp tur a ni a, ram leh hnam tana kan duty a nih angin kan hlen zawk turah ka ngai.

Chhiah chawi chung-changah hi chuan sorkarin a tih tur dik tak ti se, mipui lam pawh hian kan tih tur chu kan hlen chho ve zel mai ang. Mipuiten chhiah kan chawi, a hmanna kan hriat ṭhin loh vangte hian na kan ti ṭhin a ni.

Sorkar pawh hian chhiah kan chawi te hi, a hmanna mipuite min hrilh hre ṭhin se a lawmawm hle ang.

Road tax kan chawi tam ang hu a, kan kawngpui
ṭha chuang si lo te hi mi tam zawk chuan hriatthiam harsa kan ti ṭhin. Chuvangin, kan chhiah chawi phu tawk thil hi mipuite hian hmuh kan bei-sei a, chutiang tak chuan sorkar pawh a inbuatsaih a ngai.

Engpawhnise, mipuite hian chhiah chawi hi hreh lutuk lo ila, kan koa tla mawhphurhna a nih anga kan hlen ve te pawh hi khua leh tui
ṭha nihna zel a ni.

Chutihrual chuan, kan chhiah pekna sorkar pawh hian ruahmanna fel leh
ṭha a siam a, mipuiten chhiah kan chawi hreh lohna tura hma a lak ve chu a ngai tho mai.

- Biaksiamtluanga