Kangmei lakah fimkhur ang

Village Council-te hmalaknain ni 10.2 2016 khan Zoram hmun danga an hman angin ‘Kangmei venna hapta’ kan hmang ve a. Kangmei laka kan fimkhur theih nan ‘hapta’ hran kan hmang thei hi a lawmawm a, rah
ṭha tak a chhuah ka beisei. ‘Tunah chuan February thla chauh a la ni a’ kan la ti a ni mai thei, ral rel thiam leh hmathlir nei ṭhate chuan hun lo thleng tur atan an lo inpuahchah lawk ṭhin reng a ni.

Khawvel hmun dang kan thlir chuan khuarel (nature) thil thleng vangin kangmei leh chhiatna rapthlak tak tak tak a thleng
ṭhin. Entirnan Tlang kang, Lirnghing, Tui lian leh thil dang vangte in. Continent pasarihte zinga pakhat Australia-ah chuan
ṭek tla leh ni sa lutuk avangte in ram a kang vak vak ṭhin a, mipui leh sawrkar pawh nasa takin an buai ṭhin.

Khuarel thil thleng a nih tlat avangin lo invenlawk chiam ngaihna a awm kher lo maithei. Kei ni ramah chuan kan fimkhur loh vang te, kan inthlahdah leh kut hlei vangte in kangmei a chhuak fo a, khawtlang kan buai ṭhin.

Tunah hian thing-tlang khaw hrang hrang hi han hawi vel ila, huan lo ram nghet, chhungkaw hmachhuan innghahna tur thei leh thlai chi hrang hrang hian kan khuate hi a hual vel a. Hengte hi mi ṭhenkhat fimkhur loh vang leh kut hlei vangin an kang ral fo a, a pawi hle mai.

Sap thufingin ‘fire is a good servant, but a bad master’ a tih angin; mei hi kan thuhnuaia a awm chuan ṭangkai leh hman tlak tak a nih laiin kan thunun piah lamah chuan kan tan chhiatna thlentu mai a lo ni ṭhin.

Khawvela kan neih hlu berte chu ei tur, thawmhnaw leh chenna in-te hi a ni. Neih thinglung khawnga kan din ve kan chenna in-te hi mitkhap kar lovah kangmei vangin meivapah a chang thei. Bungrua leh thil hlu tam tak a kangral a, nunna hial chan theihna a ni tih hriain fimkhur kan chhuah a ngai.

Lungdar khua pawhin kangmei rapthlak tak an lo tuar tawh a, an khaw kan hla aṭang pawh hian a pawizia a hriat theih awm e:

“Darkhawpui sumtual mawi,

Senmei an chang zo ta aw vansangah…..

Kut ruak maia luaithlinul engtikah bang ang maw?

Hnem thiam ngaiin ar ang ka vai ruai e.”

Sa leh ral hlauva kan awm lai khan mi huaisen, pasalṭhate khan mipui min thla-muan a; chutiang bawkin thlipui leh tui lian karah pawh himna kulhpui an ni ṭhin. Kangmei a chhuah palh a, hlauhawm han tawn chiah pawh hian mi huaisente hlutzia a lo lang chhuak ṭhin.

Chuvangin kang-mei hian mihuaisente pho chhuak mah se chhiatna chauh lo chu thil dang engmah a thlen lo - i fimkhur ang u.

- Lalchhanhima Chhangte, Seling