Forestry Zirna leh a kaihhnawih

Hmanni 'The Hindu' news-paper-a ka chhiar, ka ngaih pawimawh ve em em ṭhin remchanga lain kan sawi ve duh a ni. Tunlai khawvelin a buaipui mek global warming (khawvel lum chak lutuk), climate change (sik leh sa inthlak nasa lutuk) chungchang nen hian kan ram ngaw neihte hi a inkungkaih tlat bawk si.

Mithiamte sawmin Seminar te hial pawh neiin kan buaipui ṭhin a. Ramngaw kan neih ang ang te hi humhalh a, a tichereu zawnga hma la lo turin kan in zirtir nasa hle
ṭhin. Hemi kawnga hmalakna ṭha tak mai, kan ram ngei pawhin kan ṭhatpui policy
ṭha tak kan sawrkar chak takin a kalpui mek NLUP hi kan hre ṭheuh awm e.

Hetiang Policy duan chhuah a ngaih tak hial chhan han sawi ila. Mizoram chu tlangram a ni a, buh leh bal thar nan hmun rem leh ṭha kan nei lo. Chumi avang chuan kan theih ang leh remchang kan hriat ang anga hma kan lak ve mai a ngai a ni. Amaherawhchu, buh leh bal thar nana ram ngaw kan tih chereu nasat lutuk avang hian chhiatna tam tak a thlen phah fo ṭhin. A chhan leh vang chu tu pawn kan hre vek awm e. Ramngaw kan sawi apianga ka hmaih theih miah loh chu Environment & Forest Department hi a ni.

State ang pawha min hriat lar em em chhan pakhat chu kan ramngaw neih ṭhat hi a ni. Record-a a lan dan chuan zaa 92.09% hi kan ram ngaw neih dan a ni (Statistical Handbook, 2011. Dpt. of E&F, Mizoram), hei hi State dang tam takte neih loh leh awh em em a ni. Kan ramngaw min tihausaa min ti hmingṭhatu chu kan rua leh mau te hi an ni. A chik mi tena an record danah chuan Bamboo cover (mau tam zawng) chu za zela 31-33.63% a ni. Mau te hi tam ṭhin an nih avangin an tam tawh chuan an thi mai ṭhin. Chumi a nih avang chuan kan thing neih te hi kan enkawl
ṭhat a pawimawh viau awm e. Kan thing neihte enkawl
ṭhaa humhalhna ṭha tak nei tur chuan hetiang lama hmang hria, a zir chhuak ngeite hi Depart-ment chuan a mamawh ang.

Naupang fel leh ṭha ni tur chuan nu leh pa fel tak, chhugkaw inrem tak kara seilen a ngai ṭhin. Chutiang bawkin kan thingte ṭhang duang ṭha thei tur chuan Forest lam pang subject zirchhuakte ngei hi Department lam hian hre chiangin duhsak se a lawmawm viau ang. Mi hmangchang hre lo leh hetiang lama thiamna nei lo tena an enkawl chuan reiloteah kan ram ngaw neihte hi kan tih chereu mai palh a hlauhawm khawp mai. Mi hmang hria leh tiang lama thiamna nei te hi a thawk tura an lak hian Sawrkar pawhin a letin pawisa a khawl thei ang a, tunlai a kan buaipui em em pawisa indaih lohna hi eng emaw chenah chuan a phuhruk theih ngei a rinawm.

Hetiang lama thiamna chher tur hian kan State hian zirna quota kan nei a, a zir tur pawh kum tin kan in thawn chhuak ve ṭhin. Hetiang lam zirna hi Forestry chu a ni. B.Sc Forestry zirna hi Mizoram hian India ramah College/ University pathumah neiin chung college hming leh an seat neih zah te han tarlang ve ta ila:

1. North Eastern Regional Institute of Science and Technology (NERIST), Nirjuli, Itanagar - 2 seats.

2. College of Horticulture and Forestry, Pasighat, Arunachal Pradesh - 2 seats.

3. Dr. YS Parmar University of Horticulture and Forestry, Solan, HP - 1 seat.

A chunga kan tarlan takte hi Forestry zir theihna College, Mizoramin quota a neih na te chu an ni. Heng bakah hian private a Forestry zir theihna hrang hrang a awm bawk. Chung College-te chu kan tarlang vek seng lo ang. B.Sc Forestry zir tur hian Class XII (science) zawh a ngai a, Technical line a nih avangin kum li (4) zir a ni. BA emaw B.Sc pangngai te tan kum thumah zawh theih a ni. Hetiang a nih takah chuan kum 2000 aṭang chhut ta ila, kum 2015 thleng khan Forestry graduates 75 vel chu a tlem berah an awm tawh dawn tihna a ni. Hemi bakah hian Post Graduate zirna pawh ram chhungah a awm ve nual a, kan state-ah ngei pawh M.Sc Forestry zirna Mizoram University-ah hawn a ni tawh bawk.

Hemi aṭanga Post Graduate zote nen chuan Forestry graduates hi tam tham tak chu an nih ve tawh ngei a rinawm.

Graduate pangngaite kan sawi bik na ni lo se, Technical line a graduate-te hi chu sorkarin an zir theina tura sawrkar laipui aṭanga sum tam tak senga seat a lei chhuah
aṭanga zir chhuak an nih avangin ngaihsak deuh zawk se a duhawm khawp mai. Hemi line-ah pawh hian Department of Environment and Forest kan nei a, hna lak chungchangah te pawh hian duhsak bik chu nise sum tam tak senga an lo zir hahna leh midang aia kum khata an zir tam bikna te pawh a lothlawn mai loh a rinawm. Hemi kawnga lo fing hmasa State hrang hragah te pawh duhsak bikna an siam tawh hial a ni. State hrang hrangin Reservation an dah kan hriat theih ang ang han tarlang leh ila:

1. Karnataka : ACF (75%), RFO (60%), Dy. RFO (75%)

2. Jammu & Kashmir : 100%

3. Kerala : RO (100%), post dang awm thei ang ang (25%)

4. Bihar : post hrang hrang atan (50%)

5. Orissa : post hrang hrang atan (25%)

6. Haryana : post hrang hrang atan (70%)

7. Himachal Pradesh : post hrang hrang atan (70%)

8. Arunachal Pradesh : ACF leh RFO (50%) [an puitlin dawn a, sawrkar thuchhuak an nghak mek]

Forestry subject pawi-mawhna hriain Central Sawr-kar chuan National Commi-ssion on Agriculture hnenah ram chhunga Agricultural Universities tam zawkah Forestry subject zir hi thil pawimawh pakhata ngaiin a telh a. Forestry sector a thawktu indaih loh lutuk te phuhruk nan he subject hi zir turin thu a lo chhuah tawk bawk a ni.

National Forest Policy, 1988 ah pawh ram ngaw humhalh leh enkawl tur hian hetiang lam zir chhuak leh thiamna nei ngei te kutah a dah a, a pawimawhzia ziahlan a ni hial bawk a ni. Hemi a nih avang hian tuna kan system (kan kal dan) hi thlak ngei a ṭha awm e. Tuna a lan danah chuan Forest Department-in hna a lak reng reng hian Class XII (Science) emaw B.Sc graduates tawh phawt tan a hawng mai ṭhin. Hemi kawngah hian tlema in sawr zim deuh a ngai tawh khawpin a hriat. Pawl 12 Science pass leh B.Sc pass mai tena an hriat reng reng loh kha Forestry graduate-te hian an hre ṭeuh a ni. Hetiang lama hriatna nei lo an lakte training an pek leh zel hian sum lam indaih lohna te pawh a nghawng nasa viau lo ang maw? Mi thiam, hetiang lam zir chhuakte lak mai hi a ṭha ang.

Sum tam tak senga seat a lei aṭanga zir chhuakte ngei hi an hmakhua ngaiin, ngaihsak ni ve se kan ram leh a Department ngei pawh hian a ṭhat dawn a. A thiam lo leh tiang lama experience nei lote lak hi a dik ber em aw? tia kan ram hruaitu zahawm tak takte leh Department lama kan hotu liante hi inngaihtuah chiangin hma thar han la se a ṭha ngawt ang. State dangte pawn Reservation an siam thei a nih chuan kan ram te tak te ralmuang em em hian buaina leh harsatna awm miah lovin a tih ve theih chu kei mi pangngai ve mai hian kan ring ve ngawt a!

- Paul Lalremsanga

Research Scholar

(Mizoram University)