Neutral ngaihsak lo politician

Politician intite hian politics an ngaihsak luatah Mizoram chhunga voter tam ber 'Neutral' min ngaihsak loh zia a lang leh tawh. Rahul Gandhi a rawn zin ,a traffic a ti-jam leh ta luih luih a, mipui hian kan tuar zel a ni.

Rahul Gandhi chu Congress tan chuan a hlu a ni thei, Party boruak hniam tawh kaih thawhnaah a ṭangkai a nih pawhin traffic jam a siam avangin mi tam takin an buai phah asin. Inneihnaa kal tur tlai ni ta ila vawi khat chiah innei tan a nâ, mitthi vuinaa tlai nih phei chuan a kal tur leh mitthi chhungte tan Rahul-a hi a hnawk a ni. Office tlai, school bang haw tur tlai phah, hna tibuai a tam mai. Congress boruak siam tum chu neutral tan tawrhna mai a ni.

MNF-in Candidate an puan ni pawh khan khaw tin aṭangin an inkokhawm a, traffic a jam nileng. Traffic jam nasa tak mai khan nunphung a tibuai zo a, a chunga kan sawi ang khian mitthi in, inneihnaa kal tur, office kal turte an buai. MNF-in boruak an siam avangin neutral an buai hle a ni. MNF ropuina chu neutral tawrhna a ni.

ZPM pawhin hetiang bawk hian an ti thoin ka hria, ZPM Candidate Puanna pawh kha R Dengṭhuama Hall-ah te zuk ti mai se, kalphung thar chu hetiangah hian lantir tawh se, ZPM tan pawh uanna tur zawk a ni. Congress leh MNF ang thoin Vanapa Hall tho an bel a, mipui an tibuai.

Mizorama ro rel tumtuten Mizo mipui min tibuai zawngin huau huau an siam a, neutral hi an ngaihsak lo. Mani party ringawt inbuaipuia kawng zawh tih te, Vanapa Hall-a party inhmuhkhawm luih luih pawh hi tih tawp a hun tawh. Neutral hi min ngaihtuah ṭhin teh u.

- Danny L Hnamte