Assam Rifles Politics kheltute hnawl ang u
Kan Chief Minister ngeiin Lammualah kum 2019 khan Assam Rifles sawn chhuah tur thu hi a puang tawh a, tun thlengin an la sawn chhuak lo. Assam Rifles hmanga politics khelh kan sim duh loh avangin heng ti mite hi chu sira hnawl tawh tur a ni.
Assam Rifles hian chhuah an tum leh tum loh mipuiin hre ve phak lo mah ila kan ram hruaitu, Mizo pa ni bawk Kristian pa ni bawk thusawi chu a dik turah kan ngai a, Pu Zoramthanga khan Assam Rifles chhuah tur thu mipui hmaah puang mah se, lém ang min der mai a lo nih hi.
April thla 2023 khan Union Home Minister leh BJP chhuanvawr Amit Shah meuh an chah chhuak a, Lammualah ngei mai function an neih kha kan la hria ang chu. Amit Shah khan Zokhawsang lama Assam Rifles Battalion Headquarters a hawng an ti. Lammualah hian Laldenga Cultural Centre an sa dawn a, a lung a phum bawk a, a phum bo ta vang vang a nih dâwn hi. Amit Shah pawhin a nawr chhuah loh Assam Rifles hi kan nawr chhuak ta si lo, kum 2018 inthlan dâwn khan LPS hoin an kawm khan MNF President Pu Zoramthanga khan, "Term khat chhung chuan thei teh reng e a, kan sawn chhuak em em ang," tiin Assam Rifles sawn chhuah chungchang kha a sawi. A video pawh a la awm a, kawng chhawng leh cheng nuai 3 tiamtu bawk kha a nih avangin a thleng dik ta lo.
Minister chhuanvawr zinga mi Pu Robert Romawia Royte chuan cheng nuai 3 sem theih thu sawiin, "Khawia mi nge kan sem dâwn tia a semna tur hriat loh hi a mawl thlak," tiin an sem ngei ngei tur thu a sawi, hei pawh dawt bawk. Kawng chhawng siamna tur ban an phun tur kha Pu RRRA khan a sawi a, cheng nuai 3 nen pawh lem ang min der.
Lungleiin Municipal Council an thlan dawn khan Social Media titi chu Assam Rifles sawn chhuah a ni a, MNF nge nge kan ti hman a ni. Gate an siam ṭhat thlalak chu an insawn ngei tur anga tih than a ni. Assam Rifles motor lian tam tak an chetvelna tur lehkha pawimawh chu mipui hriatah Social Media-ah a darh bawk. Minister chhuanvawr dang Pu Lalruatkima chuan uar mangkhengin an insawn dan tur a sawi a, Assam Rifles chu an kelsa kanna bel leh atta nuaina nen lam an insawn tur thu a sawi a, Lunglei Municipal Council boruak pawh kha tlema zawng chu a nghawng a, hei pawh lem ang der mai a ni.
Vote zawnna atana dawt aupui duh hi kan awm tlat ṭhin hi a pawi a ni. Assam Rifles an la chhuak lo. Eng vangin nge kan Ram hruaitute hian dawt chiang tak hi min hrilh min hrilh le? Dawta bum tawk lekah mipui hi min ngai em ni? Kan vote mamawh tawh lo ang maia mipui lem ang min dertute hi Election an hmachhawn dawna ngaihdam dilna leh inphah hniamna der nen an rawn che leh ṭan dâwn. Assam Rifles sawn chhuah leh sawn chhuah loh lo zawt ang che u. Nuai 3 sem loh chhan lo zawt ula. Kawng chhawng neih loh chhan lo zawt nawn bawk rawh u. Health Care-ah damlo apiang tana nuai 2 SEDP aṭanga an dah chu lo zawt rawh u. Assam Rifles Politics mai mai khel tawh lo se, mipui hi dawt hmanga bum nawn chi kan ni lo.
- KC Lalramzauva