A tam mah mah lo maw?

Mizo ṭhalaite nih chak (aim in life) chu Lammuala vawi khat tal inkhelh, Vanapa Hall-a vawi khat tal zai a ni e, tiin tun hma khan an sawi fiam ṭhin. Thil pakhat belh ka duh - TV-a vawi khat tal lan ve.

Tunlai hian Mizo music video hi a surin a sur a ni ber a, kan ṭhianpa pakhatin, "Ani hi chu Ruthi Group inhmuh khawm zanah zai sela a tawk viau asin maw le" tia fiamthua a sawi ang chi kha kan tam riauvin ka hria. Hei hian chhung lam quality aia pawn lam lan dan kan ngaih pawimawhzia a tarlangin ka hria.

Tunlai music ṭhenkhat ṭha ka tih lohna chhante chu:

1. Zaitu aw a pawnlang: Tunlaia kan zai mi ṭhenkhat ka aṭanga aw rawn chhuak hi chu a pawnlang hle a, "Kan kawm thlangah vawkin bal a ei" emaw "Ka arngeng ka deh" emaw "Tunlai hian nghapih rate a sang" emaw tih thu kan sawi laia kan emotion level ang bak hi an pel meuh lo niin a lang. Zai thiam ni tur chuan thinlung chhunga thu awm phawrh chhuah a ngai a, a harsain a hahthlak reng a ni. Chuvangin, zai thiam tling mi tam tak chuan ruihhlo an tih phah hial reng a. Aw ril phawrh tur khawpa taimak a ngai a, mahni inluh chilh tura huaisenna neih a ngai a ni.

2. Hla thluk a sawngnawi: Mizo hla hian diatonic scale a pel mang lo va, a pawi em em hran lo ve. Amaherawhchu, tunlaia hla chhuak thar tam tak hi chu, chaw ei khamah guitar kuah ila, minute 20 chhung vel 'ne ne' kual mai mai ila, chutiang vela phuah chhuah theih tur ang chi a tam hle. Thukna a awm lo. Sap hla, chutah pawh pop song kan ngaithla hnem a, an hla thluk zul deuh siin, thleng phak chiah si lovin kan phuah chhuak a, ngaihthlak a ninawm hma em em a ni. Mahni inawih lunglen nan kan lo phuah a nih chuan tu sawisel theih a awm lo; mahse mipui hriat tura TV-a pho chhuah zel kan tum erawh a buaithlak. Depression a neih theih mai dawn alawm!

3. Music a fahrah: 'Fahrah' tih hi titinaah emaw, mipui hmaa thusawinaah emaw ka hmang ngai lo va, tute emaw rilru a lo nat palh ka hlauh vang a ni ber. Amaherawhchu, tunlaia kan soundtrack ngaih-thlak tam tak hi chu a fahrah tia sawi mai loh chuan sawi dan tur dang a vang. Fruity Loops nen mahni room chhunga soundtrack siam aia sang chuang lo hriat tur a tam khawp mai. Live music kan hmang lo va, eng programme emaw hmanga music kan rem khawm a nih pawhin a chord structure-ah emaw, a rhythm-ah emaw, expression-ah emaw hmasawnna tur a awm tho va; chutiang lamah tal chuan hma sawn tum ila a ṭha awm mang e.

4. Hla thuin a dai thuk lo: Hla thu ṭha hi tehna chi hrang hrang a awm thei ang a. Hla
ṭhenkhat chu a thu rem khawm dan leh rhyme scheme a mawi em avanga min hneh a awm a, hla thu ṭhenkhat chuan hringnun dik takin a phawrh chhuak a, min hneh. Tunlaia hla kan ngaihthlakah hi chuan - a gospel-ah pawh, pel lovah pawh - mi dang hla thu kan commission chhawng rei tawh hle a ni tih a lang. Love song lam hlaah chuan 'suihlunglen, sam ang ṭhen, ngaih ka bang thei lo, a na em e, hetiang reng a' tih vel a tel chuan love song-ah a chang ta niah kan ngai a ni ber awm e. Tunlai kan Gospel hla hi depression hla emaw tih mai tur a tam viau - 'Kei eng mah ti thei lo, beidawnna khura ka awm laiin, Lalpa min ṭanpui rawh.' Mizote hi kan phur a rit viau nge, kan theology dik loh avangin kan rilru a sawngnawi tawh tih pawh a hriat hleih theih loh a nih hi.

Hla phuah thiam kal hmasa-ten an hman ṭhin ang hla thu kan hmanpui ve ngawt hian hla phuah thiamah kan chang ta a ni lo. John Keats-an, "Hla phuahtu chu thla (moon)-ah te, tuipuiah te a chang ṭhin" tia a lo sawi ang khan, hla phuah mi chuan mahni a inchhuahsan zawk ṭhin a ni.

TV-a lan ve hrim hrim hi hlawhtlinnaah ngai tawh lo ila. Mahni inzawng ila, sawi tur dik kan neih hunah sawi ila, mi hriat hlawh tlak a nih chuan miin an hre em em ang.

- Asangtea