Pisa ṭan hma nge hun vawn dik pawimawh?
MZP hotute chuan chief minister Lal Thanhawla hmuin sorkar pisa ?an hun sawn hma chungchang an sawipui tih January 29, 2016-a Vanglaini chhuakah khan kan hmu a. Pisa ṭan hun sawn hma nge pawi-mawh a hun pangngai vawn dik tih hi ngaih-tuah tham a ni.
Ka ṭhian pakhat, mahni hnaa inpe zo tak chuan, pisa ṭan hun dik taka vawn chu thawhpuite nen inpawh a har thu a sawi. "Anmahni hek deuh tlatin min hmu a; anni an tlai thei si a, pisa ṭan hun taka thleng leh bang ṭhin hi min ngaina lo" a ti.
Sikula thawk pakhat chuan an thawh-pui pakhatin devotion-ah Pathian thu sawiin hun a hmang rei lutuk a, dar a vuak hnan tawp thu a sawi. A sawi danin, "Pisa ṭan huna thleng hman lo, pisa ban hun hmaa bang leh fo site Pathian thu sawi hi zirlaiten an ei lo" a ti.
Ni e, pisa ṭan hma hi hmasawnna tur leh inrelbawlna ṭha lantirtu a ni lo. Office dawr hian ka teikual ve fo mai a, mahni hnaa inpe tak leh dawr nuam tak an awm nual mai. Mahse, dar 10 hmalama dawr theih hi an vang viau zel a ni. Chawhma dar 11 vela dawr theiha la ṭhulo hi an awm fo. Dawr hrehawm leh zelthel ho hi hmelhriat neih
ṭhat avanga hnaa lut an ni hial em aw tih a awl bawk.
Sorkar hnathawk zingah mahni hnaa inpe zo, tui leh tih tak zeta thawk kan tlem hian a lang ṭhin. Tlai tawka thleng, dawr nuam lo em em mai an tam si. Mipuite chhiahhlawh niloin mipui laka roreltu emaw inti tlat an tam bawk. Office hrang hrangah 'thil zuar phal a ni lo' tih intar si hian, han leng lut ila nuho hian thawmhnaw an lo pharh duai duai fo mai.
Thawnthu pakhata nu pakhat ang kha sorkar hnathawk hi ni thei vek se a lawmawm ang. Laizawn pasarih an awma, pasal an neih vek hnu chuan an te berte in chu a faiin hmuh a nuam reng mai bik a. A laizawnte chuan 'Engtinnge in hi fate enkawl chung hian i vawnfai reng theih' an ti hlawm a. Ani chuan 'nitin hian ka nu leh pate rawn leng ta se tiin ka ngaihtuah a, taima takin ka vawngfai reng thei a ni' a ti.
Hetiang deuh hian Minister in emaw Chief Secretary or secretary in tlawh thut thei an ni tih hriain sorkar hnathawkte hian pisa kai hun vawng dik se, taima leh inpe takin an thawk thei ngei ang.
Engpawhnise hun vawn dik, taima taka hnathawh leh nelawm taka mipui dawr hi Mizorama sorkar hnathawkte zirthar tur niin a lang. Sorkar hnathawk nelawm leh biak nuam hi chu hriatreng an awl a, Vantirhkoh hmel hmu ang hialah ka in ngai
ṭhin. Sorkar hnathawk-te hian mipui dawr dan ṭha zawk zir tharin, kumtin training nei ṭhin se hna pawh an thawk chakin hmasawnna a awm ngei ang.
- Zoramsaia