Rahul a haw tawh

India ram politician zinga mipui lawm hlawh ber zinga mi, Rahul Gandhi chuan Mizoram a rawn tlawh a, kan ri ta huk huk a, MPF pawhin Rahul Gandhi meuh chu kawng zawh an phalsak bîk bîk a, kan MPF pawh hian Vai lal chu a lo hlau ngei mai tih kan hmu ta. MPF inremnaah chuan inthlan puan hnua kawng zawh phal loh tih a awm kuau laiin, an zawh suau suau tih kan hmu.

Mizoramah ni hnih chhung Congress an sorkar hluai mai kan hmuh khan, MNF leh ZPM tan chuan an hlauhawm hle tih kan hmu thei a ni. Congress tan pawh dinhmun hniam lutuk aṭangin a sanga invawrhna hun a ni a, an hmang ṭangkai nge ṭangkai lo tih chu Rahul-a haw hnu hian a la hriat ang.

Rahul leh hul lo lam aiin, tun ṭum chu Congress hian pathumna nih inringsa thlapin inthlan an hmachhawn vawi khatna a ni dawn a, Pu Lal Thanhawla chawlh hnua an election hmasa ber result a chhuah hunah, Pu Hawla ropuizia an hre chhuak ang. Pu Hawla hi la President hram hram se, Pu Lalsawta hi Chief Minister Candidate ni ta se, Congress boruak hi chu Rahul-a tih thawh ngai mai mai loin a awm ang.

Tunah hi chuan Pu Hawla awm ta si lo chu Pu Sawta hoin an bei dawn a, Ṭhat loh theih lohna Bawm aṭangin inthlan an chuh vawi khatna a ni dawn a, ṭha lo an tih Pu John Rotluangliana, Pu Lalrobiaka, Pu Chalrosanga, Pu KS Thanga, Pu Rohluna te kha an paih chhuak ta si a, an result a nghahhlelhawm hle a ni. Pu Hawla leh Hawla aiin Congress tana pawimawh chu MLA ngah a ni a, Ṭang Puihna an mamawh kum a ni; kum 2023 hi.

- Lalmalsawma