CM PU ZORAMA NGAIHDAM DILNA HI!

State dang leh ram danga kan hmuh ṭhin, politik kaihhnawiha Party hruaitute'n thil an tih leh sawi an neih reng reng, TV lamah emaw thuziak kal tlanga an thil tih lo sawi zauna leh lo thlirna, chutiang lam ngaihven mite'n an nei ṭhin ang hi, Zoramah hian neih ve theih a châkawm ṭhin ngawt mai. Mahse, tunah rih chuan kan ram veina thinlung leh rilru hian, chutiang hmalakna neih lam a la hawi pha chiah rih lo niin a lang. Chuti chungin, utuber ṭhahnemngai tak takte kal tlangin political figure kawmna leh biangbiakna thlir tur a awm chho ta zut erawh, a lawmawm hle a nih hi.

Lunglei Saikuti Hall-a Lunglei Special Conference neihah, Mizoram CM Pu Zorama chuan Zoram mipui lakah ngaihdam a dil a. Hun liamta kan thlirin, an sawrkar laia ngaihdam dil CM an awm tawh em aw? CM ngaihdam dilna hi eng lam hawi nge ni ta? Hripui vanga harsatna lo thlengah, mipui beisei ang an phâk lohnaah ngaihdam a dil a ni ber. Mipui lamin he a ngaihdam dilna hi, lungsi takin kan pawm thei em le?

Hripui lêng hnuaiah hmasawnna hna thawh erawh ṭhulh a ni lo a. Pawisa kan dawn tur zat kan beisei erawh, hri vangin kan dawng lo thung. MNF an han sawrkara an vanduai deuhna chu, hripui darh ta vak kha a ni ngei mai. Chuvangin, Zoram an hruai danah hriatthiamna thui tak kan neih thiam pawh a ngai reng a ni.

Hripui vanga harsatna hnuaia ram an hruai danah, mipuite hian an harsatna tawh thlir reng chungin kan lung a awi réng em le? Hripui vangin hmasawnna hna thawh vut vut theih a ni lo tih kan hriatpui. Chuti chungin, hmasawnna hna hrang hrang an thawh danah sawi neuh neuh a tam hle thung. A bikin CM Dept chan PWD-in contract hna a thawhna kawngah Zoram mipuite'n contract hna ṭha taka thawh a nihna aiin, Kamrul-a hna hmu thei fal bik lutuk kan sawi tam zawk tlat a nih kha. Tin, Kamrul-a hna tlo lo leh chawrche lutuk pawh kan sawi huai huai bawk a nih kha.

Tichuan, MNF sawrkar hun chu a lo tawp a ni ta der a. Thla leh maiah kan inthlang tawh dâwn a nih hi. Kum 5 liamta chhûnga MNF hnathawh han thlir ta ila. Kuthnathawktute khaichhuah an tumna SEDP chu, cheng 50,000 leh 25,000 in an sem thei ṭawk a. Inthlana an tlin leh chuan, sem chhunzawm zel a nih tur thu uar takin an sawi. An flagship programme an ngaih pawimawh tâwk lohzia lanna chu, an term chhûng kum 4 liam hnuah cheng nuai 3 ni lo va; SEDP an sem danah a lang kan ti thei ang. An lo sawrkar hmasak tawh hun laia an kal dan leh, tun term-a an kal danah danglamna reng hmuh tur a awm lo ti an awm a nih chuan, dawt sawiah kan puh thei lo ang.

Agriculture lamah hahipa sawi tham rotling hmalakna a awm lo a. Power lamah kan intodelh phahna hmuh tur hmasawnna engmah a awm lo bawk. Sports lamah erawh hmasawnna hmuh tur a tam hle thung. Tui thianghlim lam kan hawi chuan, thingtlang lam ngaihthahna a la pangngai reng a. Kawngpui ṭha phei chu sawi ngam pawh a ni lo a nih hi.

Ṭhalaite tâna hna siam kawngah a hlawhchham a. Sumdawnna lian tham piang sawi tur a awm lo bawk. Dik lo taka hna lak leh, eirûkna a hluar chhunzawm hle bawk. Hriselna lam kaihhnawihah hmalakna awm nual mah se, thingtlang lam ngaihthahna a la nasa hle reng bawk. CAG Report kan enin, dik lo leh ṭul lo taka sum hmanna a tam leh hle. Heng bakah hian sawi tur dang a la tam thei khawp. Mahse, duhtawk ta ila.

MNF sawrkar hian hma lam min penpui viau lo a. Kan CM erawh nasa takin a hausakna a pung thur thur thung. Sawrkar zara mi rethei lei rem rap sawi tur aiin, Zo Inspiration-in mi harsate an pui nasa zawk ringawt pawh khel tham a tling awm e.

Hengte hi mipui nawlpuiin inthlan kan hmachhawn dâwna kan ngaihven loh, kan vote thlak dan tura thutlukna min siamsaktu an ni ngai lo hi a vanduaithlakna lai tak a lo ni kumhlun tawh a nih hi. Tun inthlanah hian mipuite kan danglam ngam dâwn nge, kan politician-te an danglam zawk dâwn tih hriat hi kan hmabak a lo ni leh ta a ni e.

- Lalremliana Pachuau