Zawnga tuar ai Taxi-in tuar dawn
Delhi-ah motor tam vanga Pollution nasa tiin motor an intlan chhawk laiin kan ramah chuan hma khaw thlir nei lote Permit pek tam vangin intlan chhawk a ni leh dawn. A tuar tur lah harsa taka Taxi nei, eizawn nana hmang tak takho an ni leh dawn bawk.
Taxi tam zawk hi Politician-te campaigner emaw thil ti thei Taxi Permit an pek mah se nei rei peih lo leh khalh tak tak si loten an hralh leh chhawn a ni tlangpui. Sorkarna chang Party apiang te hri vei, Traffic Jam nasat tawhzia te leh mamawh aia tam a awm tawh tih hre reng chunga duhsak zawngte Permit an pek tam luat vanga harsatna lo thleng ta a ni. Tu sorkar mah insawi thiam tur an awm chuang lo, Official
ṭhenkhat lahin duhsak zawng lo nei ve bawk.
Permit Control-tu State Transport Authority (STA) member mi ramte chu IAS (retd) emaw thiamna bik neite ruat an ni ṭhin. Mihring tam lam te, Permit pek tawh zat leh kawng zau zawng te chhut vekin Lirthei Permit an pe chauh ṭhin. Keini ramah chuan thiamna hranpa nei lem lo political appointment a ruat a ni tlangpui a ni. Permit ngai chi lirthei pung tam nachhan pawh STA hi a petu an nih miau avangin a mawhphurtu ber pawh an ni ngei mai. Mahse mi thuawi zawm a ngaih si avangin pe lo thei lo a ni mahna le. Tichuan, STA hnathawh ber chu Permit pek leh motor chhiah (fee) tihsan hi a ni ber mai awm e.
Passenger phur chi Maxi cab, Taxi, Bus etc Permit lah a dil apiang an pe ta emaw tih mai turin passenger phurh tur nei mumal lo pawhin an tlan sup sup a, lirthei tlan a tam chuan Traffic te chu jam awm reng a ni. Maxicab pawh khaw ṭhenkhatah indin chhawkin tlan ni an in siam hial tawh a, an park-na tur pawh Aizawlah buaipui tham a ni ta nih hi... tu mawh nge?
Taxi hi mamawh aia tam a awm tih chu a hriat reng, mah se a ti sualtu niawm fahrana taxi pute tawrh tir ziah mai hi a dik bik dawn a mi? Kan Chief Secretary pension pakhatin Sorkar hnathawk mamawh aia tam (over staff) kan awm a tih avang khan tunge sorkar hnathawk tawrh tir emaw dem ziah bik le? A tisual leh ti dik lotu, hisap nei loa permit pe vak vaktute hi an demawm zawk a, a mawhphurtu dik tak pawh an ni; hengho hi demna chang mipuiten kan hriat a hun ta.
Aizawl City Bus pawh a tam tawh avanga an in din chhawk mek laiin tun hnaiah Sorkar ber chuan a duhsak zawngte Bus Permit 15 lai an pe leh mauh mai a nih kha. Bus pakhat sei zawng hi feet 20 vel a ni a, Bus 15 belh khawm chu feet 300 a nih avangin feet 300 lai Traffic Jam siam belh hi Permit petu mawhphurh a ni chiang khawp mai.
Tourist nei tam ber ang zia-zangin chhuanlama duhsak zawngte tan Tourist Bus Permit 20 lai mai an pek belh leh bawk a. Traffic Jam leh motor tam hi Sorkar hian tih tak zetin a vei lo a nih hmel. Co-ordination on Traffic Management Committee lamin Traffic jam tam loh nan hma lak an tum a, mahse hetih laiin a Permit pe theituten an pe reng bawk si a. Sorkar pawh hi an in Co-ordinate ṭha lo tih a chiang reng mai, ava mangan thlak ṭhin tak em.
Chuvangin, Taxi intlan chhawk hial a ngaih leh phah tak chhan Permit petu lam dem leh tawrh tir si lo a, Zawnga tuar ai motor neitute tawrh tir ziah mai hi sim ni tawh teh se.
- Lalchhanhima