System dodal pawl

Mihring piang chhuak hi chuan thil hi kan dodal vei run mai a, a piana piang ve lo a siama siam Adama leh Evi pawh khan Pathian system kha an dodal sa chu a nih ber kha mw. Mizoramah pawh hian chutiang thinlung pu chu kan tam a, hei hian Adama thlah kan nihzia pawh a chiang maiin ka hria.

Thuneitu lamin sikul kal hma tur an ti a, thuawih takin mi tam berin an kal hmatir a. Harsatna tam tak awm mahse buai chuk lovin kan ṭan hma thei ta a, chhungkaw tam takin tun thlengin an la buai phah a, chhungkaw tam tak erawh an buai ve lo.

Keia thlir ve dan chuan sikul hi an ṭan hma ta ni lovin sikul ṭan tlai ṭhin khan midangte rualin kan ṭan ve ta ang vel a ni. State tam zawk chuan sikul hi dar 7:30 leh dar 8:00-ah an ṭan a nih chu mawle. Heng state-te hi Mizoram aia ni chhuah tlaina state an ni zawk lehnghal a, keini hi khaw chhak tak maia awm kan ni a, Mumbai velah chuan zingah thimlaiin sikul an kai tawh an ti. Engpawhnise system thlak dawn hi chuan system dodal pawl hi an awm ve hrim hrim tih hi pawm a ngai a ni.

Tichuan, Zu an khap a, sorkarin a khap a, kan sawisel luai luai a. Zu khap ṭha kan tih loh vang nge sorkar tih a nih vang pawh ka hre ve thiam lova kan sawisel leh luai luai mai. Pastor hriat hlawh tak, a pension hnu thlenga zu leh a kaihhnawih a buaipui awm ka hriat hauh loh pawh zu dotu langsar tak a han ni lehzel mai te hi a mak a, thlir dan dang aṭang chuan a lawmawm letling viau zawk a ni.

Dodalna tam tak karah sorkar chuan zu a zuar ta tho a, kan sawisel leh luai luai a, zu khap laia khapna kawnga tha thawh pawh hi chuang lovin kan han tawng luai luai zel a, system hi chu a ninawm a ni ang, a khawi zawng zawng pawhin kan dodal zel mai chu a ni.

Sorkar hmalakna apiang dodala sawisel pawl hi an awm bawk. Hengte hi a ṭhen chu mi rilru kawi an ni a, a bak chu siam ṭhat duhtu pawl, ram vei mi an ni. System i dodal hian a khawi zawk hi nge i nih tih lo inchhut ve ṭhin turin ka ngen a che. Siamṭhat duhna rilru pu chunga system i dodal a nih chuan ka fak che a, siam ṭhat duhna rilru pu chuang loa system i tawngpawng dodal a nih chuan ram tan mi hnawksak i ni e.

Tax chungchangte pawh hi han en la, mi tam zawk hi chuan tax a nih vangin an dodal nghal a, ṭhenkhat chuan an lak dan ngun takin an chhut a, a fel lo nia an hriatah an dodal ve leh chauh a, a inang lo. Siamṭhat duhtu an awm a, sawi ve hrim hrim an awm bawk. Ram siam-
ṭhat hna hi sawisel
aṭanga inṭan a awm a, a ṭhen chu thuawihna hmanga inṭan pawh a awm a ni. Siamṭhat duhtu nge i nih sawisel ve ringawt?

- Lalrammawia