Kut hna thawh hi!
Hman ata tawh kan duh leh kan tum ber chu sorkar hna thawh a ni a, nu leh paten an fate sum tam tak senga lehkha an zirtir chhan ber pawh kut hna thawk lovin sorkar hna thawk se an tih vang a ni deuh ber. Sorkar hna hi hna zahawm leh ṭha berah kan ngai niin a lang.
Ṭhalai lehkhathiam tam tak hna thawh tur nei lo, chhungte thawh chhuah sa ring mi tam tak an awm chhan pawh hi eng dang ni lovin kut hna thawh kan ngaihnep vang niin a lang. Nu leh pate pawh hian an fate kut hna thawh zahthlak lohzia zirtirna chang an hriat tawk loh vang niin a lang bawk. Zirtir chu sawi loh kut hna thawh hrehawmzia an hrilh fo zawk a ni.
Chutiang ang zirtirna chu a bikin thing-tlang nu leh pate zingah a hluar a, khawpui nu leh paten an fate an zirtirna pawh a ni tho mai. Chumi avangte pawh chu a ni mahna kan
ṭhenawm ram leh state pawn aṭanga rawn kalten Mizoramah hna thawh tur an hmu reng zel mai a nih hi.
Mizo ṭhalaiten hna thawh tur a awm lo, tia engmah thawk lo leh ti lova kut kuangkuaha nuam taka TV hmaa kan ṭhut lai leh khaw-laia kan tei suau suau lai hian kan ṭhenawm state vai-ho chuan Mizoramah ngei hian hna thawh tur a tam hlein an hria a. Ṭhenkhat phei chuan ILP pawh nei lovin a rukin Mizoram hi an rawn lut a, kan ram sum tam tak hi an ramah an lalut reng mai a nih hi.
Hetiang renga kut hna thawh ngainepa kan awm a, kan kal zel chuan hna thawh zah nei lo vai-ho hian eng tikah emaw chuan kan duh emaw duh lo emaw Mizote hi min la chimral ngeiin a rinawm.
Mi tam tak hi chuan kut hna thawh kan han tih hian ram lam hna leh nitina mi thuhnuaia inhlawha hna thawh chauh hi emaw kut hna thawh kan ti ṭhin. He kan ngaihdan hi a dik lo. Kut hna thawh chuan sorkar hna ni lo mahnia eizawnna ngialnghet nei tura beihna zawng zawng pawh hi a huam vek awm e.
Mizo tlangvalten kut hna thawh kan zah pui loh hunah kan nulate pawhin kut hna thawh ngaihsanna chang an hria ang a, chu chu hnam tan thil pawimawh tak a ni ang. Mizo tlangval tam takin kut hna thawh an hreh chhan chu Mizo nulaten kut hna thawh ngaihsan nachang an hriat tawk loh vang a ni.
Hna thawh zah nei loa eng hna pawh taima taka thawk mai ṭhinte hian hlawhtlinna an chang ṭhin. Kan eiru emaw sum lak luhna dang kan neite a nih ngawt loh chuan dik taka sorkar hna thawk a, mahni hlawh bak cheng khat pawh hlepru ngai lotu tan chuan a hausak tak tak theih loh. Khawvela mi hausa ber berte hi sorkar hna thawk an vâng khawp.
Kut hna thawh hi
ṭhalaite hian i zak lo ang u - hausakna a ni si a!
- Nawlchunga Chinjah, Siaha