Mizo Zu i sa teh ang u (Khualzin hip nan leh kan ram economy ṭhan nan)
Chanchin ṭhain kan ram a rawn thlen a, hnam pumpui kristina kan inleh hma khan kan Mizo society-ah khan kan hnam nuna bet tlat thil ṭha leh hlu, ṭangkai tam tak a awm a. Kristian kan nih tak hnu khan thawk leh khatah an zavai hian bo duak lo mah se kan culture-a bet tlat ṭhenkhat erawh chu zosapte (kan ngaihsan em em khan) min hnawl sak a, chung zingah chuan kan Mizo Zu kha a langsar ber a ni hial awm e. Ringtu ni chunga Zu no khat lek pawh in chu, hremhmun tlakna ngei ngei ang tluk hialin vawiin ni thleng hian kan ngai ta emaw tih tur a ni ta!
Mipui leh kohhran duh dan a nih leh nih loh chu thu hran, nikum aṭang khan kan ramah MLPC Act hmanga zu zawrh a lo ni ta. He Dan hian hman a nih hma aṭang rengin dotu leh thah tum nghal tam tak a rawn hring chhuak nghal a, kan sakhaw puithiam ṭhenkhatte phei chu au ring ber berah an ṭang hial a nih hi. MLPC Act hi hman a nih chuan, kan ram chu Sodom leh Gomora ang maia suahsualna tinreng so bulh bulh tur a nih thu zawlnei ang hiala inngai niawm takin an sawi hlawm a nih kha.
Chu dan chu hman an ni ta ngei a, inti zawlneiten an hrilh lawk ang em chuan thil a thleng ta si lo a, hrilhlawktute hian pawi ti tak maw?! Mahse, kan hman
aṭanga rei vak loah Zu in avanga thi erawh an pung deuh thut nia sawi awm hi, a tak ngei ni pawhin a lang. Hei erawh hi chu kan sawrkar hian ngaihthah a thiang lo. Zu kan lak luh hi quality chhia a nih ngat chuan, kan hnamin a tawrh tur hi a rapthlak dawn em mai.
Made in Mizoram kan mamawh
Kan ti ta sa sa, tuna kan kalphung en hian chuan sawrkar pawhin zu chhiah aṭanga pawisa a lak luh hnen poh leh Vaiho hnenah kan state pawisa a luangral hnem ting mai a ni - kan zu lak luh hi vaiho siam leh ta an nih miau avangin.
Kan mamawh leh kan tih makmawh nia lang ta chu, sawrkar hian hnmanlaia kan Mizo zu - Zupui, Tin Zu, Zufang etc. te kha sak phalna siam sela, tuna MULCO-in Bawnghnute an la a, a tling lo chu an hnawl zel a, a ṭha chauh an la ang hian kalpui ta se. Hei hian kan ramah eizawnna thar tam tak a siam chhuak ang a. A in lo thei lo tan pawh zu hrisel leh ṭha an in theih phah dawn a ni.
Hetihlai hian phai lam aṭanga kan zu lakluh te pawh a quality ṭha leh thianghlim chauh a nih bakah, a lakluh hrim hrim a tlem phah ang a, chu chuan kan ram economy chu sang takah a vawrh kang ngei ang. Mizo Zu han tih hian, grape leh kan thlai thar chhuah hrang hrang aṭang hian siam phalna permit pe chhuak bawk se. Tunah hian Zawlaidi ringawt hi chuan, a siamtute tan lukhawng a nei ta mang loa sawi hi a kiam bawk dawn a ni.
Hriselna atan a pawi lo ang
Naupang te kan nihlai aṭanga hman ni lawk thlenga zu in ṭhin ṭhenkhat hi ka chhut let vang vang a, regular taka zu in ṭhin pawh hi hmai puam ek uk, dulkiar hen hun leh hnar ṭawk hler hlur hmuh tur an awm meuh lo. Hna an thawh nasat vang pawh a nih theih tho rualin, an zu in ṭhin kha an hriselnain a tawrh phah lo hrim hrim niin ka hmu. Hun a lo kal hret a, local zu a lo chhuak a, local zu in regular-ho chu hmai ṭawk, hnar ṭawk leh dulkiarah an chang vat a, hmuh pawh an hrehawm ṭhin hle.
Hman kum deuh mai aṭang leh MLPC Act hman a lo nih hnu phei hi chuan, hnar ṭawk leh hmai ṭawk pawh an awm hman tawh meuh lo. An hmai a dum thawl nghal a, rei vak loah mual an liam zel ta mai niin a lang, hei hi a chhan chu thil dang vak niin a lang lo; an zu tlan quality ṭhat loh vang ni berin a lang. Chuvangin, Mizo zu ngei siam phalna hi pek chhuah ni se, kan ramah ngei zu ṭha i siam ang u.
- David L.Ralte, Six String Cabin