Hnam Vanduai
A thling baw hawka Politician te kap hreptu Pastor senior-in boruak a siam hluai lai khan, kan Politician hlun hmingṭha taka Politics chawlhsan pakhat ka interview a. Pastor Senior thuchah chungchanga a ngaihdan ka zawt a, “Politician-te hian kan nemngheh rawngbawltute an enkawl Kohhran miten an duhkhawp lohna lai hi vantlang hmaah puang chhuak chiam ila, an lawm bik emaw chu," a ti vei roh a. Ka thlir loh dan takin chhanna ka hmu a ni.
Inthlan kum a nih angin mipui thinlungah Politics a lang lian a, kum 4 chhunga ngawi mai mai te pawh kan au sup sup a ni. Social media kaltlangin kan phun sup sup a, a lo dawngsawngtu lamin thuhnu pawh dawn lovin kan chhang let a; chutiangin mi zahawm nia kan ngaih Kohhrana nemngheh rawngbawltute pawhin thu an dim chuang lo. An beih chiam chiamte hi an beramte tho.
Tuna kan ram leh hnam boruak hap chu lungawi lohna leh inrin lohna hi a ni, hei hi a vanduaithlak takzet a ni. Hnam vanduai mahni leh mahni inringtawn thei tawh lo kan ni e.
Kan hriat angin kan ṭhenawmah kan mite leh hnam dang inkar thu a chhia a, inrawkin an inthat a. Sahimna zawngin hmun tin kil tin an dap ruai a nih hi. An ram hrehawmna kan lo hriatpui a, Manipur ramah remna leh muanna a awm theihnan kan ṭawngṭai ur ur a, nunaute thlamuang takin awm se kan duh.
Mahse, an mu tan chu an inringtawn tawh lo hi a ni, leh lam leh lam thla a ngam lo ve ve. Hmun khata cheng an ni a, hnam thuhmun lo an la ni zawk. An tana ṭawngṭai ṭhinte chu hnam khat, tlang khat leh ruam khata cheng, mahse inringtawn lote kan ni hlauh thung.
Political Party campaign au hla chu a taka thleng turah kan ngai ngam lo, an inziah mawisiak mai mai niin kan hria. Politician leh Party Worker ten keini chuan kan ti ve lo vang an tih lawm lawm chung pawhin ngaihdan kan lo nei a, 'han sawrkar chiah se eng an ang bik lo vang' tih hi a ni tho tho.
Politician an ṭah chuan mipui lam chuan ṭap der hmuhin kan hmu a, Politician te pawhin an mipui, MLA an nih theihna te chu uire leh mai tur hmuhin an hmu a. Ngun takin ngaihtuah ila, chhungrilah a dik kan ti ang.
Sawrkar hnathawk lam han thlir ila, sawrkar hnathawk chu eiru hmuhin kan hmu fai leh deuh vek a. Peon pawh lehkha phek tal paipawn turah kan ngai. Miin concrete building khir uai khawpin an sa a, a engkhaw sawi set set lovin a eiru a ni hrim hrim kan ti a, ṭhenawmpain lirthei nalh tak a rawn khalh haw zur zur mai a, 'a hlawhin a daih lo' a staff-te'n kan han ti zui leh a. Hetiang hi kan inbihtawn dan dik tak a ni, hausa tura mi thawhrimna kan hmuh kàn lui tlat a, kan inringtawn ta lo lutuk hi siam ṭhat a va ṭul em.
Moral Reformation thlentir turin tunah chuan Political Party lam an pawimawh hle a ni, ka ti ve lo vang ti ngamtu Party hi an sawrkar a nih chuan mipui rilru hi siam ṭha tel rawh se. Hnam inringtawn thei lo nih hi a vanduaithlak. Chuvangin Ram hruaitute, Kohhran hruaitute, Tlawmngai Pawl hruaitute hian mawhphurhna lian tak an nei tih inhria se la. Kan hnamin a mamawh Moral Reformation hi thlentir rawh se.
- Rosangzela, Vh, Ph: 8974138026