Faina sahbawn tui!

Mizote hi faina kawngah kan hnufual viau ṭhin a. Pi pute hunlai phei kha chuan hnam fai ber pawl chu kan ni hauh lo mai. Amaherawhchu, kristianna hmanga Isua ringtu kan lo nih tak hnu hian chak takin Mizo mipuite nunphung hi a inthlak zung zung a ni. Tunah phei chuan Aizawl khawpuia mipui tam zawk hian faina kawngah nasa takin hma kan sawn tawh a ni.

Thingtlang lamah pawh ni se hmuh theih faina kawngah hmasawnna a zuang a, khaw fai lawmman te pawh India ram huapa la thei Mizoram thingtlang khaw zingah an awm ta hial mai te hi hmasawnna duhawm tak a ni.

Mizote hian sah-bawn chi hrang hrang kan hmang ve a, heng kan sahbawn hmante hi khawchhak lam aṭanga an rawn ken leh vaiho siam a ni deuh vek mai a. Mizoramah chuan thil engkim hi sumdawngho rawn ken luh ang chauh kan hmelhriat a ni ber a, sumdawngho lakah hian kan nitin mamawh neih tak hi a innghat thui hle a ni.

Tuna ka sawi tur erawh hi chu faina kawng chikhat faina sahbawn chungchang hi a ni. Mizoram chhung khaw hrang hrang-ah ka zin kual ve nual tawh a, hengah te hian kawng lak hotel-ah te chaw kan ei ṭhin a. Tun hnai kum sawm chhung hian faina kawngah hma kan sawn viau a ni. Hotel chawei dan, sahbawn leh tui hman dan hi thil ho te anga lang ni mahse hriselna atana thil pawimawh ber ber an nih ve avangin ka lo chik ve fo ṭhin.

Hma kan sawn tawh viau lai hian sahbawn hman danah erawh hma sawn kan la ngai viau niin a lang. Tun dinhmunah chuan Mizorama thingpui dawr leh hotel tam tak hi kan chik ṭhin a, thleng sil nana kan hman tam ber chu insukna tura vaihoin an rawn siam sahbawn phut (surf detergent) hi a ni a, thlengah leh kutah a rim a kai a, a reh mai thei ṭhin lo a ni.

Kuta kai sahbawn phut rim hi a reh mai thei ṭhin lo a, chawiei ti tui lo tham a ni a. Tin, thlengah te tuiin kan chiah per pur a, rei tak tak kan hmang a, hriselna atan pawh a pawi thei hialin a rinawm. He thil pakhat lek sahbawn avanga hian kan hriselin kan hrisel lo thei dawn tihna a ni.

Khawpuiah pawh mi tam takin sahbawn phut hi thleng sil nan te kan la chelek viau a, thleng sil nan leh kut sil nan chuan sahbawn phur aiin sahbawn tui (liquid soap) hi a
ṭha ber a, thil bal leh mawm pawh a fai duh ber bawk a ni.

Sahbawn tui hi thil bal leh mawm ngam tak accit slurry leh costic soda leh thil dangte hmanga siam a ni a, thleng silna chi rim nei lo a awm a, hei hi hman nachang kan hriat a hun tawh e. Economy zawnga chhut pawhin sahbawn tui hman hi a hlawk zawk bawk a ni.

- Lalthianghlima