Aizawl Municipal Corporation hmalam pan se

AMC inthlan dawn khan party lama ṭhian ṭhenkhatten manifesto point ṭhenkhat min lo ngaihtuah pui teh an ti ve mial a, ṭhenkhat chu ka lo buaipui ve a, amaherawhchu an telh mumal ta lem lo a ni ang! Tuna AMC Mayor Pu Lalhmingthanga hi ka mi hriat chian, ka lehkha zir pui ṭhin a ni a, politician lo tak, mi rilru nghet leh mi dik tak a ni. A ni leh a thawhpuite zofate khawpui hmasawnna an thawhna kawngah duhsakna sang ber ka hlan e.

India ram khawpui inawp danah Municipal Corporation te hi an pawimawh em em a, vanduaithlak takin Aizawlah AMC kan hmuh hmasak ber politics thlichhia avangin a chiri a, an duh ang pawhin hna an thawk thei lo achha chu a ni ber a. Tun term thara mite hi chuan tluang takin hna an thawk thei turah beisei ila.

Municipal Corporation hi Mizo mipuite pawhin kan la hmelhriatna a la rei lo hle a, mahni ṭhahnem ngaihna vangin tuna kan khawpui enkawltute lo enzui leh zir chian atana ka awh zualte kan tarlang ve duh a ni.

Free Wi-fi Zone

Inthlan dawn vuakvet khan tuna AMC sawrkarna changtuten Free wifi khawpui chhunga dah a ni ang tiin an tlangau pui a, social media lamah nuihsawhna leh fiamthu ang renga beihna a tam hle a ni. Ram changkang apiangah internet hmanna hi a tam zel a, Free wifi zone phei chu India ramah pawh a tam em em tawh a ni. Mizoten mobile hmanga data connectivity emaw Wifi kan hman danah Facebook leh Whatsapp etc.. vela tan kan hmang tam ber tih a hriat a, hengte hi chu social media application kan hmanna awlsam ber a ni chauh a, chu ai chuan he Free Wifi hian hmasawnna tam tak a thlen dawn a ni.

Prime Minister Modia meuhin Digital India a kalpui mup mupah hian Free wifi hi mipuiten kan mamawh a, kan hman
ṭangkai a ngai hle dawn bawk a ni. Aizawl chhungah Free Wifi zone engemawzat siam lo ni ta se, awmhmuna banking tih te, online application han tih mai te, information kan duh zawng han download leh han en maite kha thil harsa a ni tawh dawn lo. Heng bakah hian kan ṭhalai tam takte hian mahni awmna apiangah mobile hmangin hna an thawh theih phah dawn a ni. Chuvangin, Free Wifi hi thil namai a ni lo a, AMC lam pawn service provider te nen uluk takin indawrna siam se, Aizawl hi an term chhung ngeiin Digital City ah min han siam sak teh se.

Tenants Acts/ Rules

Aizawl hi zofate Jerusalem a ni a, nitin mai hian kan pem lut a, Aizawla mihring tam zawk hi mahni in leh lo ni loa khawsa mi in luah kan ni. Dan lamah chuan mi in luah leh neitute zawm tur hi a awm ngei ang a, mahse Aizawlah hi chuan kan zawm lo mai ni loin kan hre lo hle a, kan dan lam thiam te kutah awm se. Amaherawhchu, Aizawl khawpui chhungah hi chuan AMC hian hma an lakna ngei turah ka ngai a ni.

Hmanni mai khan kan u pakhat mi challang ve tak pakhat chu kum 15 eizawn nana a lo hman tawh a in luah chu ani aia luah man sang zawka luah duh an awm avangin a neituten chhuak turin an ti ringawt mai a ni. Chutiang bawkin Aizawl chhungah hian mi in luaha awm tam takte hi rem leh rem lo a in luah an tam hle a. In neituten an tih ve tur toilet
ṭha, tui supply ṭha, electric supply mumal leh inluah maintenance te ngai pawimawh lem lo a, duh duh huna in luah man tih san te, in nawr chhuahte hi Aizawl mipui tam zawkte harsatna a ni a, mi hausate hlau lo thei lo kan ni.

Hemi kawngah hian India ram khawpui tam zawka an tih angin inrelbawlna ṭha zawk leh dan mumal kan neih vat a ngai a, Aizawl inluah/dawr luah man hi a sang chak hle a, a neitute mamawh dan ang angin in luah man hi tihsan a ang hle a, square feet chuti zatah chuti man chu tih a awm lem lo hle a ni. Chutihlaiin mahni inhmun ni lo leh thingtlang aṭanga khawpuia awmhmun ben bel tum tan chuan harsatna lian tak a ni.

Tuna AMC hruaitute hian zirchiang se, mipuite tana ṭha tur zawk han ngaihtuah chhuak se a lawmawm hle ang. Achunga kan tarlan bakah India sawrkarin project lian tak tak a kalpui dungzuiin Mobile governance te hi mumal taka kalpui a hun tawh. Mipui nawlpuiin awlsam taka mobile hmanga AMC kan dawr zung zung theihna tur ngaihtuah a hun ta, kan state sawrkar pawhin SMS hmanga mipuite hriselna hmasawnna turin state ṭhenkhata an tih ang deuhin Dr. SMS emaw Mobile Hospital te hi kalpui a hun tawh tak zet a ni. Engpawhnise AMC sawrkar thar hi state sawrkar nen inhne rem takin kal se, party politics chirhdupah zofate Jerusalem hi kun leh tawh lo hram se ava duhawm em.

- Remruata Varte