Taxi in tlan chhawk
Kan khawpui tawt lutuk tih ziaawm nana Co-Ordinator Committee on Traffic Manage-ment, Home Minister Chair na hnuaia meeting chuan lirthei zawng zawng in tlan chhawk an han rel ri feih feih a. Mahse a hmawr bawk nan Taxi in tlan chhawkah bawk an rel leh a, a enchhin nan hrim hrim lirthei zawng zawng hi an no last digit ang zel hian Calendar Day-ah hian han chawl chhin se la a ṭhat dawn nen. Mahse thutlukna chu “Hmana kan sawp hrep hnu kha sawp leh hrep ang” tih ang chiah a ni.
Taxi in tlan chhawk hian Traffic jam a sutkian loh chuan tih bik nei loin zau takin ngaihtuahna han hmang leh se. Pawl leh Kohhran pawhin a nawr her theih miah loh hi keini ang tan han kawih her zia reng a ni si lo.
Taxi Permit hi Sorkar hian a pekchhuah loh na a rei tawh a, Taxi hlui a thara thlak (replacement) hi ‘Dan’ in a phal angin engemaw zat chu a thar a piang a. Chu ‘Dan’ chu a phal leh tawh lo a, accident chhe vek chauh replace a phal leh a, chu pawh chu STA Board Meeting hnuhnung ber chuan min phalsak leh ta lo a ni. S.T.A Board Member pawh hi Party aiawha dah mai lo hian mithiam bik awm sela. Tuna sorkarin Permit Replacement a tih vel dan hi chu ‘sawhthing rate’ mumal lo ang chauh a ni. Tin, Transport Director leh Secretary inthlak ngun lutuk pawh hi a pawi
ṭhinin ka hria.
Local Taxi te tan All Mizo-ram Permit, City Area pawna kal theihna Rs 1,000/- chawiin kan la ṭhin a, hei pawh hi min tih tawpsak leh hmiah mai. Lengpui kal tur pawhin Road Permit lak zel a ngai dawn ta a ni. Office Hour-ah chauh he Permit hi a lak theih si a, thihna thilah pawh Aizawl chhuahsan chu a buaithlak dawn ta hle a, taxi te hi Aizawl khawpui area chauh kal thei ang kan ni ta. Lo ngaihtuah chiang ve teh u.
Plying Permit kumtin renew ṭhin khan kum nga chhunga renew a lo ngai ta, Taxi hlui kum nga service thei tawh lo tur tih chiang tawh pawhin kum nga chhung atan renew a ngai a, tha a na duh khawp mai.
Tin, Passenger and Goods Tax pe kan ni a, Life Time Tax min la chawi tir hi chu a rilru nat thlak khawp mai. Eizawnna tak taka hmang tan chuan Life Time a han pek chu kan harsat ang tih a chiang sa. Tin, Auto Rickshow-ah pawh Life Time tax an la dawn a, kum 15 an Service thei ang emaw chu? Kan chhiah pek hian awmzia neiin kawngpui te ṭhat phah deuh se la, kawng an repair te lah a thil hul a, kan phiat vum leh thur a, thil dangah hmantlak der si lo.
Aizawlah hian Taxi 3,700 vel a awm a, Traffic SP khan 6,500 awm angin a sawi a, kha kha chu Mizoram pum a ni ang, a hre sual deuhin ka ring. Taxi te hi in thurual i la, pawl lian tak kan ni mawle. ZTOA leh ZTDA a awm a, engtiklai khan nge Taxi Worker Union a lo awm leh tak; Pawl din mai hi kan va awlsam em!
Regulation and Control of Parking hi Traffic Police kuta awm awm tak, A.M.C kutah a awm daih te hi a mak teh daih ka ti. Nileng zankhuaa kawngsira motor dah ti kiang si lova Traffic jam control nan taxi in tlan chhawk an ti leh ringawt ṭhin hi chu a tha nat thlak ṭhin mang e. "Democracy ram kan ni alawm” tiin in hnem teh phawt mai ang u.
- Madawnga