DAMDAWIIN EXPERIENCE

January 2016 tawp lamah khan Synod Hospital, Durtlanga Lawmna Ward-ah naute neiin kar khat zet kan awm ve a.Tunhmain damdawiin lamah hian chhungkua lo awm ve zeuh zeuh tawh mah ila, buai phili reng renga hun kan hman ṭhin avangin thil ka lo chik ngai lem lo a. Tun ṭuma kan awm erawh, hun thawl kan ngah deuh avangin damdawiin kalphung ka chik ve neuh neuh a, rawng an bawlsak mipuite tana Damdawiin lam insiamṭhatna tur ni a ka hriat vete tarlan ka duh a ni.

Synod Hospital, Durtlang hi an administration a felfai a, Doctor an ṭhain dawr an nuam a, Nursing service pawh a lo la ṭha vat vat khawp mai. Hetiang lamah hi chuan sawisel tur reng reng ka hre hman lo. Amaherawhchu, Hospital hmasawn zel duhna avangin rawtna tlemazawng ka’n siam ang e:

1) Chaw : Tlai dar 4:00 velah hmanhmawh takin chaw an han sem a, a semtute an polite tawk lovin, a dawrtu mipuite an nawr tet tet reng mai. “Dawh lo in la awm em? Rawn dawh thuai thuai rawh u...” an ti lung lung reng mai a. Damlo buaipui laklawhte a awm theih nasa si a, a buaithlak duh viau. An chaw sem eitute khan a thlawnin kan ei lo a, an customer kan ni tih hre reng se a duhawm ngawt mai. An chaw sem dan (thlenga chaw leh chawhmeh an suah dan bawrh bawrh) thlengin a changkang lovin jail tang chaw semin an sem ni berin ka hria. Kan pawisa chawi leh an service kha a inmil lo takzet!

Chaw ei hun tlai dar 4:00 hi damdawiin dangah pawh a lo ni deuh vek mai. Doctor ward fan hunte leh thildang nen a insu buai a nih chuan kan sawi theih a awm lova, a nih loh chuan hei aia tlai deuha chaw ei ve theih nise a duhawm ngawt mai. In lamah hian tumahin tlai dar 4:00 ah chaw kan ei ngai lo a, zan lam rilṭam a na duh hle. Man chawia kan ei a nih rau rau chuan chaw ei hun pangngai deuha ei theih nise a duhawm. A buaipuitute pawh an eizawnna a nih angin an in adjust mai tur niin a lang. Hei hi damdawiin dangah pawh siamṭhat theih nise thil ṭha tak a nih a rinawm.

Chaw ei man Rs. 100/- a ni a, chaw chhuan 3 danah sa kan ei tlangpui. Sa hmeh ṭum chuan a ziaawm viau a, a bak chu Rs. 100/- chawi nan chuan na tak a ni. Ṭawng thu chhe lovah awm leh dawn ngat ila chuan Hospital Canteen-a mi hlir kan ei tawh ang. Hospital canteen-ah chaw (rice chhum) Rs. 20-30 man chu a ei tham hle a, Sa plate khat Rs. 50/-, bai Rs. 20/- man nen, Rs. 100/- tho seng hian tuihnai zawkin mahni duh ang ang a ei theih tlat. Mahni duh hunah, lum thar tharin chaw ei hun pangngaiah a ei mai theih bawk si. Damdawiin awm tur apiangin hei hi an hriat fuh vaih chuan damdawiin chaw pangngai ei peih an awm mang lo ang tih a hlauhawm hle.

Tin, chawhnu lam dar 1:00 velah kan in admit fel a, kan chhuah ni pawhin chhun dar 12:00 hmain kan chhuak fel hman daih a, chuti chung chunga kan luhni leh chhuah ni, zing leh tlai chaw kan ei miah loh an bill tel ṭalh mai kha a va Kohhran Hospital tih chi loh em ka ti. Ka’n zawt kual deuh a, midang pawh chutiang vek chuan an lo bill a, keini chuan mi 2 ei tur kan order ṭhin avangin kan eina ni miah lo Rs. 400/- kan chawi chuang ringawt tihna a nih chu.

1) Security : Synod Hospi-tal hian Private hospital dang ang thoin Gate duty/ Security duty turin private security company/ agency an ruai a, a remchangin a felfai thlarh mai. Inkan hun a tawp veleh ward tinah an lo kal kual a, damlo kantute chu inkan hun a tawp tawh tih an rawn hrilh mai ṭhin. Chutah tak chuan security duty zingah polite lo fe fe an awm leh ta a. Ṭha taka inkan hun a tawp tawh tih rawn sawi a, polite taka chhuak tawh tura intih awm ta hle hle lo chuan vau rawng kai lek lekin an rawn bei ta mai ṭhin a. ‘Order’taka mipuite chhuak tura min han ti fo mai kha chu, customer kan nihna aṭanga ngaihtuah chuan a na leh lek lek ṭhin. Polite taka
ṭawngkam mawi taka mipui dawr dan lo zir nawn leh teh se, police an ni tak tak ang tih a hlauhawm em mai.

February 17, 2016 zingkar khan New Life Hospital General Ward-ah damlo ka kan a, inkan hun tawp chiaha security duty (hei chu company/agency dang an ni) in nui sang chunga ‘inkan hun a tawp tawh e’ tia dam lo kantu mipuite min han hrilh erawh kha chu dawnsawn a nuam zaih thung mai! Polite tak khan min nawr thiam a, kan chhuak zung zung mai a ni!

2) Bathroom/ Toilet: Lawm-na Ward-ah chauh khan a ni nge ka hre lo, inthiarna repair a ngai takzet, ṭha kim alawi a awm lo. Hei chu sawi thui lovang, Hospital thuneitute pawhin an hre reng ang a, sum a awm remchang rih lo emaw, siamṭhat tura ruahman mek emawte a lo nih palh takin.

Damdawiina kan awm hian (a bikin private hospital-ah) damlote hi customer kan ni a, doctor leh nurse-te hi hlawh nei a kan rawngbawltu, min enkawltu an ni. Damlo enkawlte, medical lam hna reng reng hi rawngbawlna a nih rualin profession, hlawh neia hna thawhna a ni tih hriat reng a ngai. Chuvangin, doctor leh nurse-te, staff dang reng rengin damlote hi zah takin an dawr tur a ni a, chutiang chu damlote pawhin kan beiseiin kan phut ngam tur a ni. A thlawna enkawlna dawng kan ni reng reng lo tih hi hriat reng a ṭha khawp mai.

- C.Lalhriatpuia