Bus leh Taxi hlui tawh hi

Aizawl khawpuia city bus leh taxi hlui tawh lutuk service mekho hi engtia tih tur nge ni ang. Aizawl khawpui chhunga service chauh ni lo, khaw kar kawnga bus leh maxi cab service pawh hi thuneitute'n enfiah fo a ṭul ta khawp mai.

City bus ṭhenkhat chu MZ-01/A te a la tlan mek a, heng bus-te hi enkawl ngun an ni em? nitinin mi tam tak an phur ṭhin a, nunna hlu tak phur chungin kawng chhuk chho deuh deuhah an tlan reng bawk si a. Heng bus hlui tawh tak takte hi uluk takin en dik se, a thara thlak ngai tawh te pawh a awm nual ang a, thlak ngai chu thlak phalsak ta se. A thar an nei thei lo a nih chuan a permit titawp ta mai se, bus thar nei thei hnenah a thlakna tur permit pe leh ta se a ṭhat hmel.

Khawpui a chep telh telh a, bus lian tak tak rei tawh tak tih hriat reng reng a la service hi a inhmeh tawh lo chang a ni lo, mipui tan a him lo em em a ni. Bus ṭhenkhat phei chu pollution lam mit aṭanga thlir pawhin khawpui chhunga service tlak lo a awm nual a, hei pawh hi thuneitute'n enfiah atan a ṭha khawp mai.

Tunhma kha chuan bus reng reng a silencer kha bus hma lam, driver ṭhutna lo lamah bus chung chen velin an khawh chhuah tir
ṭhin a, khang hun laia bus-te erawh a lian chi kha a ni bawk a, a khu kha mihringin an hip ngai meuh lo a ni. Tunah chuan khatiang kha a awm tawh si lo a, bus engine ṭawng deuh, khua luai luai
ṭhin te pawh a tam tawh a. Heng bus hlui tawh lutukho phei chuan mihring hriselna a tichhe thei hle a, hei pawhin ngaih-tuahna thar nen en zui a, tih dan
ṭha zawk ngaihtuah chhuah ni thei se.

Khawpui chhung taxi service tam tak pawh a hlui a tam ta mah mah niin a lang. Khawpui ṭhang leh changkang zelah service tlak lo tur anga ngaih theihho hi thuneitute hian enfiah ta se, a thara thlak (replace) te pawh phalsak ta se, bus ang bawkin a thar an lei thei lo a nih chuan permit tihtawp nise, taxi tam lutuk pawh a ziaawm ngei ang.

Tunah hian taxi intlanchhawk tir tura hma lak mek a ni a, hei hi tihpuitlin ngei a ṭha ngawt mai. Taxi chang ni lo, private light vehicle ho pawh hi number kawp kim leh leh kawp kim loin thliar ta se. Taxi intlanchhawk tir a, taxi neitute leh driver-te rilru na pawh a ziaawm phah ngei ang.

- Lalkhirhvela