Police sawisak leh politician-te

Tunhnaiah Bung-kawn Vengah police officer pakhat duty lai leh a driver sawisak an ni a, a sawisatute pawh man kim an ni tawh a, kha thil thleng kha a pawi mai a ni lo a, hnam ang pawhin a zahthlak; khatiang kha thleng tawh lo se a ṭha khawp mai. Khatianga mi sawisak ngawt duhna rilru pu awmna, Bungkawn Veng Local Council leh YMA ang pawha action lak chi a ni.

Sorkar hnathawk zingah police leh a kaihhnawihte hi palzut leh sorkar ang pawha kut thak hnawihna berah kan nei emaw tih tur a ni. Kan politician-ho lah hian police-te hi an zah lo fal hle a, report engemaw awm hlek se a chhan chhui chiang loa transfer ngawt an ching em em a, an lakah zah an ngai ṭhin lo.

Hei vang hian civil lam pawhin kan police-te hi kan zah loh phah niin a lang.

Police officer tam tak pawhin kan politician-te hi an hlauhtlawn nasa a, politician-te'n com-plaint nei hlek se action an la nghal zel a, hei vang hian politician-te pawhin an zuam phah hle a ni. Hetihlai hian kan police officer engemaw zat chuan complaint dawng pawh nise, an naute chu an dik leh dik loh te, lehlam thu chauh la loa lehlam thu pawh ngaichang a, action la mai lo pawh an awm.

Engpawhnise po-litician-te hi mikhual ang chauh an ni a, kum nga an lal a, an lal nawn leh a nih loh chuan an pil vang vang ṭhin. Sorkar hnathawkte chu an pension hma chu sorkar ta, mipui tana thawk an nih hi politician-te pawhin an hriat a ṭha ang.

Sorkar department-ah pawh hian Home department hi thawktu tam lama a ber kai zinga mi an ni a, an hlawh leh hamṭhatna chi hrang hrang pawh a hautak tham hle. Hetihlai hian budget lamah vur an ni meuh lo a, transfer TA/DA lakchhuah te hi an harsat em em a, officer lam tan chuan a lo awlsam deuh a nih pawhin a hnuaihnung lama thawktute tan chuan nghah vang vang a ngai ṭhin.

Battalion-a mi an ni emaw, unit hrang hranga mi, rank hniam leh hlawh tlem zawkte phei chuan transfer TA/DA te chu an lak tur chanve ang vela hralh an tam mai. Hei hi sum mamawhna a san vang a ni a, a lo leitu khan mi harsa zawk a lo ṭanpui a ni tihte hi ka hre thar ve a, chutianga ti lo thei loah a din miau vang a ni.

Medical bill pawh a chhuak har em em ṭhin a, department dang aiin home department-ah hian a zual leh-nghal. Hei pawh hi an hotute lamin politician an tlawn nasat nghawngah pawh a puh theih awm e.

- Pek Hlua