"Ram hruaitu ropui" an nih ve theih dan kawng

Khawvel ram hruaitu ropuite an ropuina chhan ber chu an chenna ram leh a chhunga cheng, ram mipuite an hmangaih em avanga retheih ngama theih tawp chhuah ṭhin, an lawmna pawh an hnathawhah kan tih ṭhin te hi, ram hruaitu ropui an ni ṭhin a.

Ram hruaitu ropuite zinga ka ngaihsan ber pakhat Lee Kuan Yew, Singapore Prime minister chanchin hi kan sawi teh ang. Kum 1980 chho vel khan, ram hruaitu leh thuneitute eiruk leh hlep ruk (Corruption) nasat lutuk avangin Singapore dinhmun chu chhe tak a ni a. Mi rethei, kut dawh tamna, pawikhawihna hluarna leh dang dangte pawh niin mipuiten rilru fim pawh an pu zo lo. Singapore khawlai pawh a ṭawphnawk hle a.

Huaisen tak leh retheih ngam, ram mipuite ṭhatna tura ding ngam Lee Kuan Yee a lo lang a. Kum 1959, June Ni 5 aṭanga kum 1990, November Ni 28, (Ni 11499) thleng Prime minister nihna a chelh ta a.

A hmalakna vangin Singapore chu khawvela ram hruaitute eiruk kawnga fihlim an tehnaah pakhatna a nihtir thei a. Faina kawngah pawh khawvel ram fai thlanchhuah zingah lang ziahin, tun dinhmuna Singapore hlangkai thei a ni.

Singapore University Convocation Dinner-ah thu a sawi a, "Ram hruaitu ramin hun harsa a tawh laia i hausa a nih chuan i damlaiin chil an chhak ang che, i thih niah lawm avangin an kut an beng ang," a ti hial a nih kha.

Mi ram hruaitute chu an hnathawhin mipui, mi harsa zawkte hnen a thleng pha a, ramin hma a sawn. An ram mipuite'n an fak tawp theih lohna chu, ram tana Prime Minister rethei ber, Chief Minister rethei ber an nihnate a ni ṭhin.

Mizoram hruaitute "Ram hruaitu ropui" an nih ve theih dan:

Sawrkar ṭhaah chuan ramin harsatna a tawhin ram hruaituten mawh an phur ngam a, hma an la ṭhin. Hruaitu taima lo, hlemhletnaa fihlim lo, a ngaihna hre lote tan chuan mawhpuh tur zawn mai chu thil awl tak a ni ngei ang. Chhuanlama an hman ṭhin, "Mipuiin an zir lo," tiin ram dangah chuan sawi ila min nuihzat ngei ang. Leader nei lo Society emaw min tih hial a rinawm.

Lal taka awm a, mipui che vel thlir mai maitu ram hruaitu kan neih chuan, mipuite chu kan hawihai vel mai mai dawn tihna a ni. Hruaitu mawhphurhna kan sawi avangin mipuiin tih tur kan nei lo tihna a ni lo, ram hmasawnna hi Sawrkar leh mipui ṭanrualnaa lo awm tur niin; a pawimawh zawk erawh an awm tih kan hrethiam thei ang.

Tuna Mizoram dinhmun hi, kan ram hma lam hun tur ngaihtuah chuan kan mangang tlang chu a nih hi maw!

Kan ram hruaitute "Hruaitu ropui" an nih ve theihna lai chu, Kum 5 chhunga mipuite tana an tih tur leh an rawngbawlsak tur ti miah si lo leh, sum awm lo chhuanlam reng renga mawhpuh tur zawng kual, ramin hma a sawn phahna tur pawh ni lem loa mi dang sawisêl reng renga hun an hman liam laiin, inthlan dawn hma thla hnih khat awmah kum 5 chhunga an tih theih loh an ti thut thei ṭhin hi an "Ropui" ka tih ve theihna lai a ni. In thlan dawn hmaa hnaruak hnawhkhah thut te, bial mipui hmangaih thar thut te, Sawrkar Shool-a hlan kai thut te, damlo ngaihsak thut leh damdawiin chei mawi thut te, infiamna kawnga ṭhalaite ngaihsak thut te, thut a ni vel vek mai... Inthlan dawn hian ram hmangaih thut, bial mipui hmangaih thut theihna an nei hi "Hruaitu Ropui " an nih ve theihna lai a ni.

"Hruaitu ṭha chu mipuiin an hruai tur a ni lo a, mipui a hruai tur a ni".

- VL.Thlamuanpuia