ARITHMETIC PROGRESSION (Ka Maths Tutor kha)

Ka hriat reng chu tlai khat rilru hah hmel em ema ka school bang, In ka lo thleng chu ka hmel lan dan aṭang chuan ka rilru a hah a ni tih chu ka nu chuan a lo hre thiam ni ngei tur a ni. Min han zawh nâk chuan Maths test naa ka fail thu leh kan Sir-in sa zai min pêk thu te, kan test question chu vawi za (100) ziak chhuak vek tura min tih thu leh a ziak lo lo chu a class-a kan awm theih tawh loh tur thu ka sawi chuan kei aimahin a rilru a lo hah emaw tih mai theih tur a ni. Eng dang a ni lo, ka Maths thiam lohzia chu sawi mai hian a siak lo a ni ber.

He ka harsatna vang hian school kal pawh min ti phûr lo ṭhin. Tichuan ka nu chuan hetiang reng ai chuan tiin ka Maths Tutor tur chu a rang lamin min zawnsak ta nghal a. Tichuan Pathian zârah kan veng ṭhenawm lawka cheng tlangval pakhat, College graduate tawh chu min hmuhsak ve ta hlauh mai a (tuna ka hriat leh danah ani kha M.sc Statistics NEHU, Shillong aṭanga chhuak a ni awm e), kan han zir ve ta tak tak ta a nih kha. Vawi khat chu ka Tutor chuan lehkhazir kan ṭan leh hmâ chuan game pakhat khelhpuiah min sawm a, eng ang game nge tia ka zawh chuan number indawt te tea pakhat (one) aṭanga za (hundred) thleng remkhawm hi a vaiin inbelhsiak ang a han ti mai chuh, keia Maths thiam lo mai ni lo, belh chak bawk si lo tan chuan zawh dawra suk tin ang mai a ni. A âtthlak ve ang reng khawp mai. Mahse kan han khêl dun ngei a, kei chuan calculator hmanga ka han belhkhawm zut zut lai chuan min lo en reng mai a, a lo zo der tawh chu niin! Mak ka ti khawp mai a, a ngaihna hriat loh hmel taka a tih dan ka han zawh chuan, khi suk chung hian 'awlsam te a lawm' tiin a tih dan chu min hrilhfiah ta a ni.

A hmasa berah chuan he formula 𝑆 = [𝑎 + 𝑙] hi kan hmang dawn a ni. Hetah hian S hian SUM (a vaia belhkhawm tihna) a entir a, ‘a’ hian number-a term hmasa ber a entir a, ‘l’ (small L) hian number-a term tawp ber a entir a, tin, ‘n’ hi chuan a vaia term zat (entirnan: pakhat aṭang za thleng chu term za a ni mai, 1st term, 2nd term, 3rd term, 4th term…100th term) a entir ve thung. Chutichuan, nichina kan game play kha kan chawk dawn a ni. Pakhat aṭanga za thleng han belh chhoh diat diat tur kha a ni a (1+2+3+4+…100) calculator vela pakhat leh pahnih belh chu pathum, pathum leh pathum belh chu paruk, paruk leh pali belh chu sawm (1+2=3+3=6+4=10….) hetianga ti duah lo hian, awlsam tein khi'ng formula hmang khian second hnih khat chhûng lekin a chawh zo theih reng mai.

Kan hriat angin number 1+2+3+4…100-ah hian pakhat aṭanga chhiarin za thleng, a vaiin term za kan nei ka tih tawh kha; ‘n' value chu 100 a ni, term hmasa ber chu 1 a ni tih kan hria (hrethiam chiah lo tan, number 1 aṭanga a inṭan avang khan a term hmasa ber chu 1 aw), chuvang chuan ‘a' value chu 1 a ni. Chutiang bawkin a term tawp ber pawh number 100-in a tawp a, ‘l' value chu 100 bawk a ni. A formula-ah a value kan dah luh chuan 𝑆 = 100 [1 + 100] a lo ni ang, bracket chhunga 1 leh 100 kan belh (plus) ang a, a pawn lama 2 leh 100 khi kan divide leh ang. Tichuan 50 leh 101 chu kan puntir (multiply) leh chuan 5050 a rawn chhuak ang. Chu chu a chhânna a ni. Hetianga (1+2=3 leh 3+3=6 leh 6+4=10 leh 10+5=15 leh 15+6=21… and so on) 100 thleng kan han belh meuh chuan a tawpa tawpah 5050 a rawn chhuak leh mai dawn a ni. Mahse, hetianga ti duah lo hian formula hmangin awlsam tein a chawh theih a nih chu.

Chuta ṭang chuan Maths hi ka tui phah ve ta viau mai a, keima tâwkah hma ka sawn chho ve zel a ni. Min zirtir dan kha a thiam em em mai a, tih dan (style) bik tê kha a nei ti ila ka sawi fiah thiam ve dan ber a ni mai. Tichuan ka rilru hahpui ve em em ṭhin subject-ah pawh hma ka sawn ve viau ta chu; Matric pawh Pathian zârah ṭha takin ka passed ve ta a ni. Tun thleng hian keipawh lehkhazir paha inhlawha Tuition pe ve zeuh zeuh ka ni a, ami zirtir dan ang khan kei paw'n ka zirtir ve zel a, naupang paw'n an hrethiamin an hlawkpui viau zel chuan ka hria. Ka phu lohin Pathian zârah an nu leh pate lam aṭang paw'n fakna ṭawngkamte ka dawng ve fo a, hei hian min tihphûr phah ve em em ṭhin.

Amah anga mi dangdai ve tak ‘ka Maths Tutor kha' khawi school pawh hian nei ila, kan harsatpui fo ṭhin; Maths subject-ah pawh hian hma kan sawn phah ngeiin a rinawm.

- Joel Laldinpuia Thlyutha, Meisavaih West, Siaha