Zawl khawpui fan chang hian
Thingtlang khua lam hla tak aṭang pawh hian kan Aizawl khawpui hi kan chak lakna ber a ni a. Chuvang chuan khaw hla tak tak
aṭang pawhin maxi cab service a insul zut zut a nih ber mai hi.
Aizawl khawpuia chhungkhat nei mumal lote pawh hi chi seh lamin kan kal ve fo lo thei lo a. Inthlahrung angreng tak chungin kan kawmchhak pa fate zirlai, mi in hnuai luahte inah kan thleng ṭhin a, thingtlang pa chan hi a va han chau ṭhin tak em.
Mahni ina Pathian-ni tuka sa hmeh ngam hlei lo khan thlenin te laka inthlahrun tih ziaawm nan nei leh nei loin bazar sa kan han lei ve a. Nupui fanaute tel loa pa berin sa han ei tuam tuam lah chu chaw ei a tui chuang hauh lo. Aizawla chhungkhat hnaivai deuh nei chu kan it ngawih ngawih ṭhin a ni. Sorkar hotute hian thingtlang lam mite puala thlenna tur building hi ngaihtuah ve mai chi niin ka hria.
Aizawl khawpui leh a chhunga chengte hi khawpui mi an nih miau avangin kan chik ve ṭhin a, kawng engkimah kan beisei sang a, hawihhawm hle turah kan ngai bawk.
Damdawi ina kan in entir dawn te hian OPD card laknaa card pe chhuaktu thinchhe tak leh min hrawk deuh khur khur han tawn chang hian kan zam tlat a. Nurse thinchhe tak tawn fuh chang phei chuan kan bing deuh mup mup ṭhin. Thawktu fel tak tawn fuh hlauh erawh chuan kan tan damdawi mum lian tak an ni thung.
Office hrang hrang kan han dawr ve ṭhin a, thingtlang pa hi chuan a kalhmang kan hre lo deuh nge nge bawk. Mi ṭhenkhat chuan kan hriat lohna te hi min hmusit nan leh min hauhna remchangah an hmang hlauh a, mipuite zara hlawh la an nih thu erawh an sawi lang ve ngam si lo. Sorkar hian hnathawktu a lak dawn hian thiamna hrang hrangah bakah 'hawihhawmna qualification' te pawh hi felh ve tawh se ka ti ngawt mai.
Engpawh ni se thingtlang pa Aizawl zin hi zawng kan khaw hawi a zim a, kan buai em em bawk. Traffic police te leh taxi driver ho hi an fel deuh ber maiin ka hria; kawngpui kan dan te thlengin min hrilh thlap ṭhin a! Taxi driver zingah pawh hnai tea thlen theih hla deuha hel ching pawh an awm tawhin ka hre lo.
Khawvel chang-kanna ṭhang zel hian kan Zoram zimte pawh hi a thlawh khum bik lo a, kan khua aṭanga Aizawl thleng tura ni nga vel kal ngai ṭhin pawh kha tunah chuan kan lehlang lo chauh tawh a nih hi.
Zofate Jerusalem Aizawl khawpui nawm leh nawm lohah hian a chhunga chengte mawh a lian em em a, khawpui nuam, changkang leh felfai ni zel tur hian kan khawsa zia hian a va han hrilh thui tehlul em.
- MC Lalthianghlima, Cherhlun, Mizoram