Pu K. Vanlalauva lehkhabu ziah bihchianna
November 10, 2015-a tlangzarh Independent puan leh Uderground sawrkar tih kha ka tuipui vang pawh ni lem loin a hawrawp a hraw a, chhiar a lo nuam phian mai a. Ka chhiar zo ta thuai a, vawi hnih ka chhiar chhuaha ka hmuh dan ka ziak dawn a ni.
Ram leh hnam veitute min chawm zo lo deuh: An (MNF) hotuten March 1, 1966-ah Mizoram Independent mi 61 hming ziakin an han puang ta pawp mai a. A puangtu zinga la dam mi 11 zinga ka mi rin deuh maiin ka zawhna min chhan dan chu "Khatia Independent meuh in han puang ta kha in lungrual meuh maw? lehkhathiam lah in kat nuk a, tawrhnain a hmuak che u tih pawh in hmu pha ruau ruau awm si a?" ka ti a. Ani chuan, "A puan hun turah chiah kan inhnial; a puan hrim hrimah chuan lungrual tehreng mai. Kan hotupa Pu Denga-ah khan kan innghat ngam bawk a, kan pâwr tlang teh asin," tiin min chhang.
Khang lai chanchin Pu Auva'n a rawn ziah lanna lungrual hle si: E. Pakistan-ah an chhuak thla a. An zuk inlungrual ta lo a, A dumpawl an inti a, an in man a, an rawn in nawr chhuak chiam chiam mai a. Hemi chungchang a chhan leh vang pawh hre hle tura ngaih siin a rawn ziak tel lo hian, a chhan awm min dap kual tir nasa lutuk; a tawp thlenga underground-a awm a, an headquarters-a awm reng bawk si.
A dawtah: Kha chen Treasury-a awm, audit hna thawk bawk; pocket money lah a te ber aṭanga hotu ber thlengin thla khatah cheng 15/- an dawng a. E. Pakistana an awm chhung zawng buhfai an dawng bawk a, ram dang (foreign) pawisa an dawn dan leh a zat, engtinnge money exchange an tih ṭhin? hengte a ziak (rih) lo hian hnam thuthlunga chiangte min hrai thlai zo lo deuhin ka hria.
Hengte leh a ruh lang deuha tih lan chi apiangte han hrut leh se chu kan dang ro zual a rehin ka ring. Tin, a th ziak khan mi pawi sawi a hlau lutuk deuhin ka hria. A ṭhatna ve mai mai erawh chu an (MNF) movement kalphung, he lam hriatpui hauh loa an lo sawrkar ve em em dan a ziahah, mimal pawi sawi si lo, fiah tho bawk siin a ziak a. Mi fak chi chu ni ila han fak tur a ziak ṭeuhin a hmu.
Mizoten underground meuhin an zalenna an sual a ni tih hre duh tan chuan he lehkhabu hi chuan a sawi chiang ngang mai le. Sikula zir atan pawh iaiawm lo tak a ni.
- Rinkima, Khawzawl