Free wifi aiah chawhmeh bazar
Aizawl khawpui hi a changkangin thianghlim chak viau a, a mi chengte pawh kan lo hausa ta a ni ang; sa talhtuten ni khata sa an hralh hnem dan aṭang ringawt pawh hian sum kan ngah ve tawk tih a hriat theih a nia!
Mahse, motor ṭha pui pui chhung aṭangin sweet kawr kan paih chhuak a, chhungkaw member kimin handset changkang hum fur mah ila, pawn lam mawina ringawt kan um chuan mi nuihzat kan la ni tho ang. Hetiang dinhmuna ding mek Mizote'n hmasawnna tur kan neih tam tak zinga ṭhenkhat chu kan nei tawh a, mahse kan ngaihthah ang reng tak thil pawimawh deuh ni si chu thlaithar zawrhna tur bazar kan nei lo hi a ni.
Tunah hian Aizawl Municipal Council chuan mipuite beng verh zawng tak a thlawna internet hman theihna tur 'free wifi' an siam tur chu an tlangau pui mek a,
ṭhalaite beng pawh a verh khawp mai.
Mahse mipui nawl-pui tana thil pawimawh hmasa zawk chu inlak vaiṭingṭangna thil changkang lam hi ni loin hriselna atana pawimawh chawhmeh zawrhna tur bazar neih hi a ni zawk.
Tunah chuan khaw-pui kawng sir step-ah chawhmeh kan zuar a, motor khuin a bawm reng a, kan ek rahna slipper-in kan ei tur chawhmeh te kan rap palh fo mai. AMC intihlar tumna - "Free wifi a thlawnin kan pe dawn" tih vel mai mai hi ram hnuk khawih thil a ni miah lo!
Wifi support hand-set hmang thei chin chuan internet pack leina tur an nei vek a, zu man tur pawh an la nei cheu ang! AMC hian mipuite tan malsawmna nih a tum tak tak a nih chuan whatsapp leh fb vela thlalak dukdak lo inthawnna tur free wifi ni loin; kut hnathawka eizawng mahni thlai thar zawrhna tur hmun nei ve lote hi pui rawh se. Hmasawnna hna hi a ler aṭanga thawh ṭan chi a ni lo, a bul aṭanga ṭan tur a ni ngai e. Lansarhna ringawt kan um a, hmasawnna ngialnghet kan ngaih-tuah loh chuan lawng bunga chuang ang chauh kan ni ang a, nakin lawkah kan la pil tho ang.
Chuvangin, AMC hian ṭhalaite rilru hnehna tur free wifi mai mai buaipui lo hian thlai thartute chawhmeh zawrhna tur bazar hmun hi ngaihtuah sak phawt zawk rawh se.
Politician ṭha lo ang maia lansarhna tur thil ringawt ngaihtuah loin mipui hriselna khawih thil, mi harsa zawk kuthnathawktute tan AMC hi ding se. AMC hian thlai thar zawrhna tur bazar siam hi hna hmasaah nei rawh se.
- Ramhmangaiha