Inthlan zunzam

Mizo mipui ten kumin kumtawpah kan inthlang dawn tih kan hre lawk vek a, kum dang ang bawkin Election Commission of India (ECI) in inthlan hun a puang dawn tih pawh kan hre sa vek–mahse ECI lamin a hun tur an rawn puan meuh chuan min barakhaih hle tih a chiang.

Zoram People's Movement (ZPM) chu candidate tur puang fel hma ber an ni a, an tih chian hma pawhin bial vil tur an ti chiang hma hle. Bial vil tur chungchangah ngaihdan thlak leh siamṭhat ngai an nei a, social media lama sawi zui han hlawh ve deuh mah se thawm a nei zui ring lo, a tawpah thu dik a lan leh zel mai avangin an inchingfel hma hle.

Mizoram Pradesh Congress Committee leh Mizo National Front (MNF) te beisei aiin inthlan hun a hma hret a, inringlawkin inbuatsaih lawk viau mah se an tum ang hun aia a hma miau avangin chawpchilh leh hnawhsarum taka thil tih pawh an nei nual, tun thlenga chinfel hleih theih loh pawh an la nei niin a lang.

Mak tak mai chu, Mizorama party hlun leh lian tak, mi tam takin candidate an chak em emna ṭhin Congress hian bial 40 a ding tur an duh ang mi an hmu kim hleithei lo kha a ni, bial ṭhenkhatah chuan an elpui tur party ten an duh loh an hman a ngai hial–kan boruak a sang zel, tiin au ṭhin mah se an ṭan khawh hun a tlai miau avang leh an party chhunga a zatve velin hmasawn vak ai chuan inthlan lehpek an thlir zawk miah avangin an boruak a sang thei lo–kumin inthlan result puan zawh hunah an la buai dawn chauhin a rinawm.

MNF hi an mak bawk–an mahna pakhat chu party discipline nei ṭha an ni, ramhnuaia rorel tawh an ni a, thisen chhuak khawpa che tawh an nih vang nge chu ka hre lo, an hotute thu hi a kawi a ngilin an zawm deuh zel–bial inchuh deuh ho pawh an chingfel thei. An makna pakhat chu, rorel lai ni siin bial ṭhenkhatah chuan ding tur an 'In Hnawn' chiang a ni! Hei hi Aizawl khawpui chhungah a ni.

Nimonation an file tawh a, tunah chuan inthlan inbuatsaihna pawhin a vawrtawp a thleng ta. Aizawl West lama pa challang tak pakhat chuan, "ZPM chuan thil an tifel hmaa, inthlan puan a nih meuh kha chuan candidate te chuan an bial chhunga In tin an tlawh chhuak hman deuh vek tawh, hei hi an ṭhatna tur chhan a ni," tiin a sawi a, a thusawi hi a dik dawn ni pawhin a lang.

ZMP-in candidate an puan hma avanga demtu leh diriamtu an tam a, sawiselna leh puhmawhna pawh a tam. Mahse, kan inthlan thut dawn avangin tun dinhmunah chuan MNF leh Congress te hian inthlan atana kut lo thlak hmasatu ZMP hi an awt rilru viau niin a rin theih.

MNF hian 'Last Fight' ti ni awm takin media an bawh huam huam a, chutiang bawkin Congress chuan sum hmangin nasa taka infak lar an tum bawk. MNF media ruahman angin Chanchinbumite a indawta kawm ṭhin an ni a, an media hotupa pakhat chu a tawp atan an khekkhal.

A mi khek-khal pakhat chu an rawn phawrh ta ngei a, mahse maw a pawi lutuk. Assam Rifles sawn chhuah chungchang a rawn sawi leh a, an tih theih loh leh ama ṭawngkam ngei mai chu a rawn thaichhe ta daih–Hero theihna turah a 'Zero' ta zawk.

Hmanah chuan 'Last Minute' tih ṭawngkam a lar ṭhin, tunah pawh hmang an la tam. Ṭhalaite chuan last minute hi kan ngaipawimawh tawh lo, tun hma lama an chet tawh dan leh tunlaia an chet mek dan hi kan lo chhinchiah keuh keuh a, kan vote loh tur leh kan vote turah kan chiang tawh.

Khua leh tui ṭha ni turin vote thlak vek ila, nakina mi thlan tlin sa sawisel leh lungawi loh pui mai loin–kan ram roreltu leh min hruaitu tur chu keimahni ngeiin i thlang ang u.

- Sanga, Aizawl